Grupo di Adulto Mayor 'Flor di Aloë' ta celebra nan di 10 aniversario

ORANJESTAD (AAN): Grupo di Adulto Mayor Flor di Aloë a celebra un decada di amistad, compromiso y comunidad.

E celebracion a reuni miembronan, famianan y invitadonan pa conmemora e bunita ocasion aki. Durante e actividad tabatin musica, canto y hopi momento di alegria, reflehando e ambiente caluroso y e fuerte sentido di comunidad cu e grupo a cultiva durante e ultimo dies aña. Un momento special durante e celebracion tabata ora cu e miembronan a canta un cancion hunto, reflehando e union y amistad cu caracterisa Grupo Flor di Aloë.

E anochi a conta cu presencia di Minister Melvin Wyatt-Ras, kende a comparti un rato ameno cu e miembronan di Flor di Aloë pa felicita nan personalmente cu nan aniversario. Tambe e Minister a reconoce e recien participacion di e grupo na e Olimpiada pa Nos Adulto Mayor na Boneiro, unda nan a representa Aruba cu orguyo y a logra e titulo di subcampeon.

“Nos adultonan mayor ta un pilar importante den nos comunidad. Durante e ultimo 10 aña, Grupo Flor di Aloë a crea un espacio valioso caminda nan por reuni, comparti y pasa momento agradabel hunto. Esaki ta un bunita ehempel di e manera cu amistad, compromiso y encuentro social por enrikese bida di hende," segun Minister Wyatt-Ras.

E Ministerio di Salubridad, Asunto Social, Cuido di Adulto Mayor y Maneho di Adiccion ta reconoce e aporte valioso di Grupo Flor di Aloë na bienestar y participacion social di nos adultonan mayor. Ministerio ta felicita e grupo cu nan 10 aniversario y ta desea nan hopi salud, felicidad y exito den e añanan cu ta bin.