Grupo di 60+ awo por pasa oranan ameno den MFA Savaneta

Prome Minister

ORANJESTAD (AAN): Cu hopi orguyo, Prome Minister mr. Mike Eman, a reuni diahuebs den edificio di MFA Savaneta, cual ta un proyecto construi door di Gabinete Mike Eman y cu awe por mira su importancia grandi pa comunidad.

Prome Minister Eman ademas di bishita e edificio di MFA Savaneta, a solicita un encuentro cu Pasadia Oranjestad cu ta un grupo di 60+ cu recientemente a perde acceso na nan localidad.

Pa gobierno e ta di sumo importancia pa mira unda por brinda sosten y esaki tabata e meta di e reunion cu grupo Pasadia Oranjestad. A sondea e posibilidad na un di e MFAnan, pa acomoda e grupo di 60+ cu ta trece hendenan hunto y pasa oranan ameno den grupo.

Prome Minister Eman a tuma contacto cu e grupo aki y a extende un invitacion cordial pa topa na MFA Savaneta pa asina informa cu ta pone un MFA disponibel na e grupo, pa asina nan por sigui bin hunto y reuni manera nan ta desea.

Na mes momento Premier Eman a informa cu no solamente Pasadia Oranjestad ta haya e posibilidad aki, pero a reuni tambe cu Grupo Kukwisa, cu tambe ta haya mesun oportunidad di haci uzo di un MFA.

Prome Minister Eman ta reitera cu e uzo di e localidad di MFA ta sin costo alguno pa nos grandinan. A construi cada MFA hustamente cu e proposito pa fungi como localidad pa e pueblo, pero na dado momento a cuminsa cobra e organisacionnan aki pa haci uzo di e localidad. Esaki nunca tabata meta ni intencion.

Canando den pueblo, Gobierno ta conecta cu e realidad di pueblo haya un bista real di kico tur ta e necesidadnan di e comunidad. Asina Prome Minister a haya informacion preocupante di un situacion andando, caminda a descubri un restraso grandi pa locual ta trata e traspaso legal di actanan notarial di casnan di pueblo cu e habitantenan a cumpra pa medio di huurkoop.

Ta trata di 99 famia, cu a paga nan cas por completo na FCCA, pero na momento di traspasa esaki legalmente, a surgi problema cu midimento di tereno y cu te na e momento aki no por bira doño legalmente di nan cas.

Un problematica di algun aña caba, cu no a haya oido di e gobierno anterior, pero di e gabinete aki sigur a haya oido. Mientrastanto a reuni y yega na un solucion cu varios stakeholder cu a compromete nan mes cu pa december 2025, tur e casnan aki ta bira oficialmente propiedad di nan doñonan.