Grupo di 19 cursista a finalisa exitosamente curso avansa di Dominio di Idioma Papiamento

Bao supervision di Examenkamer di Hulanda

*Fundacion Corector di Papiamento a haci entrega di  diploma 

ORANJESTAD (AAN):   Despues di a pasa exitosamente 4 modulo di 13 siman cada un, un grupo di 19 cursista, tur hende muhe, a ricibi nan diploma di e curso: Dominio di Idioma Papiamento.

            E curso aki a wordo duna door di Fundacion Corector di Papiamento, pa medio di e docentenan Lilian Hernandez, Rubia Bernabela y Margriet Pourier, sosten di e team di corectornan, di Dr. Joyce Pereira y Ling. Mag. Ramon Todd Dandarė. Tabata un trabao conhunto cu Fundacion Enseñansa pa Aruba (FEPA).

            Un tremendo novedad ta cu esaki ta prome biaha cu un curso di e nivel aki ta wordo duna na Aruba y cu ta wordo supervisa door di Examenkamer Nedeland.

            "Tabata 18 luna di esfuerso y dedicacion. No tabata un curso facil sigur ya cu el e rekeri hopi analisis. A evalua entre otro habilidad di lesa y skirbi, habilidad di wak y scucha. Tabata un curso na nivel halto cu a haci nos mas consciente di e importancia di por haci bon uzo di Papiamento den nos bida diario y sigur den nos trabao.

            Sigur pa mi tabata un reto ya cu mi no a nace na Aruba y no a bay scol na Aruba. Sinembargo, cu e 23 añanan cu mi tin bibando na Aruba y trahando na DIARIO, den e ultimo añanan mi a purba di educa mi mes mas y mi a logra haya mi diploma exitosamente y cu un tremendo calificacion final", asina colega Yorleny Oduber, Editor di DIARIO y graduado di e curso a declara.

            Mester remarca cu e curso aki a conta cu participacion di empleadonan publico, voceronan di departamento, maestranan di scol, algun miembro di prensa, pensionado, entre otro.

            Diasabra anochi na Biblioteca Nacional Aruba e 19 cursistanan a ricibi nan diploma oficial durante un ceremonia hopi ameno. E grupo ta hopi entusiasma y tin e deseo di por sigui cu nan formacion den un futuro cercano.