Grupo Cristian “ICA” cu anochi di clamor na Dios pa mundo y Aruba

ORANJESTAD (AAN) – Iglesia Alianza Evangelico hunto cu 42 Pastor di diferente nominacion,  a forma un grupo den union, yama ICA, y nan a tene un anochi di clamor pa Señor, riba Plaza Padu, Diaranzon cu a pasa.

Pastor Norman Brown, ken ta dirigi e Iglesia Alianza Evangelico na San Nicolas a splica kico ta e meta di e union di Iglesianan Cristian aki, den un entrevista cu DIARIO.

“Nos ta bin hunto pa promove e Reino di Dios y su Husticia. Esey kiermen cu mester tin un contra balansa contra e inmoralidad y maldad cu ta creciendo y Iglesia tin un funcion”, Pastor Brown a bisa.

El a agrega cu Bijbel ta bisa cu ora ta haci esaki den union e mensahe ta wordo scucha. Diaranzon anochi, nan a bin hunto pasobra e situacion mundial ta preocupa hopi hende y, como creyente, nan ta confia Dios bao di tur circunstancia.

“Ora cu mundo ta den desesperacion e Cristian no ta desespera pasobra nos sa, cu nos Dios ta den control. Palabra di Dios ta bisa cu tur cos ta cla hunto pa bon, pa esnan cu ta stime y cu ta yama segun Su proposito. E ora ey loke gobernante, of pais por intenciona pa malo, Dios por bire, hacie pa bon”, Pastor Brown a señala.

El a menciona cu mundo tin e situacion di Covid 19 cu no a caba completamente ainda, tambe tin e situacion di Ukraine, y e consecuencia tey pa mundo y pa Aruba financier y economicamente, y e miho solucion pa esaki ta sclama Esun cu por yuda nos.

“Sclama na Dios Todopoderoso pasobra E tin tur cos den Su man, y ta pesey nos ta bin hunto pa lanta un clamor, un grito na nos Dios y nos ta sigur cu E ta scucha y ta habri caminda. Aruba ta bendiciona, pero nos no mester ‘take it for granted’. Nos mester reconoce Dios su camindanan y no bira lomba p’E. Esey Palabra di Dios ta bisa nos”, Pastor Norman Brown a remarca.