“Grupo contra tubo di gas” a manifesta nan preocupacion

Aurelia Croes:

ORANJESTAD (AAN)—Señora Aurelia Croes a vocifera den un entrevista, e preocupacion cu su persona hunto cu un grupo mas di habitante di e Distrito di San Nicolas, tin relaciona cu en caso cu Eagle LNG cuminza opera na Aruba, nan lo ubica na San Nicolas.

El a bisa cu debi cu un di su clientenan grandi lo bira WEB Aruba NV, nan lo tin di core un tubo di LNG-Gas for di San Nicolas te Balashi. E dama a aclarea cu e grupo aki no ta contra LNG-GAS, pero si contra e tuberia cu mester pasa di San Nicolas te Balashi, pasobra e por trece problema pa e barionan unda e tubo lo pasa. Aworaki e barionan aki tin mas cas, y mas hende ta biba compara cu 50 aña pasa.

Señora Croes a enfatiza cu su grupo ta yama “Grupo  contra tubo di gas” pero nan no ta contra e proyecto sino e ponemento di e tubo den e trayecto unda tin area habita.

El a menciona cu e tubonan cu tin actualmente, no ta haciendo ningun efecto riba salud ni medio ambiente, ya ta 50 aña caba cu e tubonan tey, y nan no ta stroba e habitantenan aki cu nada.

El a señala cu nan preocupacion ta cu no tin te ainda un estudio, un investigacion, pa splica e pueblo kico ta e riesgonan cu ta bay tin cu ponemento di e tubonan LNG-GAS.

“Nos ta papiando di tubonan cu ta bay core como 9 kilometer saliendo for di e refineria, pasando den areanan densamente habita, pues Zeeweg, Cura Cabay, Savaneta, Pos Chikito, Spans Lagoen, Balashi te ora e yega na WEB, siendo cu tin un espacio destina specialmente pa e tipo di proyectonan asina aki. Nos tur ta biba akinan, nos tur ta sinti e efecto di e subida di prijs di awa y coriente, y nos kier pa e proyecto bin na Aruba, nos ta abraza e proyecto. Loke nos no ta di acuerdo ta cu e mester pasa den areanan habita”, señora Aurelia Croes a señala.

El a subraya cu den e areanan aki tin Misa, tin scolnan, tin Cas Maris Stella, Restaurantnan y diferente desaroyo den e area di Savaneta, specificamente, y den e area di Spans Lagoen.

E ta haya cu no tin necesidad di expone tanto hende asina si por trece e proyecto pa Barcadera. 

Enberdad tabata tin un reunion di LNG-GAS cu habitantenan di e area menciona, y señora Croes a indica cu e tabata presente y un grupo di Savaneta y un grupo di Spans Lagoen a bay, y nan a haci hopi pregunta. A pidi nan pa haya inzage di e riesgo den e rapport, nan a priminti cu ora e ta cla nan lo trece esey dilanti, y e rapport di inspeccion, cual e gruponan no a haya. Aparentemente, e proyecto ta poni pa cuminza na Maart 2023, pero e habitantenan aki no ta wak cu e informacion ta transparente.

“Nos sa door di haci research y cu nos mes a busca informacion, cu e tin hopi riesgo envolvi. Nos ta papiando di tubonan cu eigenlijk ta wordo instala bao di tera, pero cu ta bay carga hopi presion pa LNG transporte for di e refineria te cu WEB.  Kiermen, cualkier cos cu bay fout eynan ta bay tin un explosion grandi, y nos ta papiando di area pobla masha denso, siendo cu tin otro opcion. Pues, pakico nos ta bay expone henter e pueblo na esaki”, señora Aurelia Croes a señala.