Grupo 16 di SVT a cuminza Dialuna cu 13 hoben participante

Jessy Ras, coordinador:

ORANJESTAD (AAN) – E Grupo # 16 di e Programa Trayecto Formacion Social (SVT), a cuminza e Dialuna aki, 13 di Maart cu 13 hoben, cu a presenta mainta trempan na Kazerne, pa cuminza e trayecto.

Jessy Ras, Coordinador di SVT, a menciona cu e mayornan y famia tabata presente, pa dispidi di nan, pasobra nan ta keda, na prome instante, tres siman completo den Kazerne.

            Aña pasa a cuminza cu inscripcion, y durante e proceso di seleccion tin hobennan cu ta cay afo, pa motibo cu sea nan a haya un trabao, of cu nan a pensa cu SVT no ta pa nan, y ta prefera pa bay scol bek. Y tambe algun cu a presenta pero no a haya interes pa participa, y otronan cu pa e test medico nan a wordo afgekeurd. Pesey a cuminza cu 13 hoben den e grupo 16.

            Jessy a duna di conoce cu ta bay cuminza prepara pa e grupo di mucha muher cu lo inicia na Augustus proximo, y si damitanan den edad di 17 te 24 aña, cu tin interes pa participa ya caba por tuma contacto cu SVT via nan facebook page, e-mail of telefon di e oficina. Informa cu nan tin interes, y SVT ta cuminza cu e proceso di instruccion.

            E linea central di e programa ta mesun cos pero nan ta purba wak con por haci miho y adapta na e programa y depende con e grupo bay, ta hacie di mes un tiki mas dificil of baha e click un tiki, pa e hobennan.

            Jessy a comenta cu e grupo di mucha muher ta bay cuminza mas trempan e biaha aki, pa purba di bay mas afo, den media, pa wak si nan por haya mas hoben femenino, pa cuminza na Augustus.

El a menciona tambe, cu e parti militar tin biaha ta spanta e hobennan, tanto mucha homber como mucha muher, pero un bez cu nan bay den e sistema y haci deporte, ta gusta e manera y nan ta bin bek.

            Jessy ta invita tur e muchanan muher cu podise nan no ta haciendo nada, y kier un reto nobo, SVT ta algo hopi positivo. E hobennan cu a caba e prome grupo di dama, nan ta bon y positivo den bida.

“Bin haci SVT, bin sikiera probe y si ta pa bo, e ora ey kizas bo por bay mas leu den bo carera den e parti militar, si bo tin diploma of bay scol bek por haci esey”, Jessy Ras a reitera.

            El a sigui bisa cu siman pasa e prome hoben femenino a finaliza e NV cu ta e opleiding militar cu tin Arubiano den dje y yiu di Curacao. “Kizas otro aña tin dos hoben femenino cu ta bay start eynan tambe pa e parti di NV”, Jessy Ras a comenta.

            El a duna di conoce cu mamanan hoben tambe por bin na remarca. Den e grupo di aña pasa tabata tin dos hoben cu tin yiu. “Pero si mi tin cu bisa cu nan mester tin un bon sosten di e famia, pasobra di mes e ta e mesun sistema cu e hobennan tin cu keda un par di siman paden di Kazerne y for di awo nan tin cu cuminza ken ta bay ‘take care’ di nan yiu ora nan ta paden den Kazerne”, Jessy Ras a señala.