GREASE, the musical tabata fantastico

Pa: Addonsito Croes

E fin di siman cu a pasa, publico di Aruba tabatin e oportunidad di bishita e musical Grease den Cas di Cultura. Cu un total di mas cu 2100 persona por bisa cu e produccion aki a resulta den un exito rotundo.

Un pabien grandi ta bay na e productornan Ferdinand Franca, Vicky Arens di Cas di Cultura, ful e elenco di cada artista, cada coordinador, musico, cada mayor, cada sponser y cada persona cu a cumpra un ticket y bay aplaudi Aruba su artistanan.  Na nos humilde opinion, nos ta tribi di skirbi cu e produccion aki ta di nivel internacional. E show aki por ta presenta na cualkier escenario na mundo. Por a ripara cu cada persona envolvi cu e show a tum’e 100% na serio. Pa un show ta exitoso, e mester cana bon, sin ningun gap y publico no mester haya gana di bandona e sala prome cu e final.  E tres elementonan aki por ser aplica den Grease, the musical!

 Cada un di boso por ta orguyoso di a contribui, cu boso talento unico, na 4 sala yena cu sernan humano, hoben y adulto, cu a bay cas cu un sentimento di orguyo y alegria. Orguyoso di ta di un isla cu talento enorme.