Gran ciudadano Atan Lee a fayece inesperadamente

ORANJESTAD (AAN): Diasabra mainta e noticia tristo a plama inmediatamente rond di e isla, pa mustra cu e conocido ciudadano Atan Lee a fayece den su soño na cas na Catiri. 

    Inmediatamente mensahenan di condolencia a cuminza plama rond.

   Tai Kim Raymundo Lee mihor conoci como Atan, a nace dia 6 di Januari 1947 na Aruba, y for di hoben caba e tabata mustra su compasion y interes pa duna un man na su prohimo, como tambe na cualkier organizacion cu e meta pa yuda hende y e isla bay dilanti.  Atan tabata un hende di tur hende!  E tabata tambe un di esnan cu a traha duro pa Connie Francis Club di Santa Cruz (awendia den espacio cu tin patras di KFC Santa Cruz), y a sigui traha na forma voluntario pa yuda hobennan den tur faceta di bida, y tambe ramo deportivo.  Tur esaki y mas ta loke el a conta den tur luho y detaye den su buki “Den Scochi di mi Mama”.

   Despues di a finaliza su educacion na MULO, el a sigui cu varios curso riba tereno di periodismo, y a specializa su mes den protocol y etiquette.  Su entrada den nivel gubernamental ta cu desde 1977 te cu 1985, e tabata consehero di Betico Croes, y su trabao a wordo mira como uno valioso.

   HEFE DI PROTOCOL:

   Durante gobierno di Gabinete Eman I na 1985, e tabata Chef Protocol di Gobierno di Aruba, y asina e.o. a traha den comisionnan cu tabata encarga pa ricibi bishita di Pareha Real na Aruba, cual a bira un gran exito.  El a keda funciona den Gobierno te cu aña 2006, y a sigui ta dunando lesnan di etiquette y protocol na varios instancia, incluyendo trahadornan di Gobierno cu diripiente tin di atende cu bishita di dignatarionan halto di exterior.   E tabata yuda tambe semper den comision encarga pa celebracion di Dia Nacional.

   Su habilidad di organiza un evento oficial (e.o. yegada di un dignatario of un miss) tabata bay cu precision di un draaiboek fabuloso cu tur punto poni riba dje na e lugar corecto, y esey ta algo cu semper a pone Atan Lee wordo bon mira!

   Na 1989 el a wordo condecora door di Gobierno Venezolano cu e orde di Francisco de Miranda Segunda.  Na 2001 el a wordo condecora pa Reina Beatrix como Ridder in de orde van Oranje Nassau.

   GRAN DEBOTO:

   Atan Lee ademas di tur esaki, ta un gran deboto Catolico y tabata yuda hopi hende cu conseho y tambe oracion.  E mes a cuminza organiza Camindanan di Cruz tur Bierna Santo madruga for di su cas na Catiri y finaliza na Kapel di Alto Vista.

   Sin duda alguno Aruba a beneficia enormemente pa e vision y perseverancia cu Atan Lee tabatin pa mehora e mundo di beyeza competitivo riba e isla.  Asina mes el a bira activo den Star Promotion cu tabatin e franquicia di Miss Universe pa Aruba.  Aki ta unda cu Atan Lee a demostra cu e ta un catalizado importante pa pone e organizacion riba pia, y a haci e certamen bira uno cu tabata atrae publico grandi.  Y aki Lee no a djis keda draai den un caha na Aruba so, sino a busca yudanza internacional pa asina haci mihor preparacion pa candidatanan.  Asina a haya diseñadornan di trahe cu a cuminza yuda Miss Aruba, y tambe expertonan cu tabata duna les riba pasarela y actitud di un candidata.  Esakinan despues a cambia ora cu Aruba mes tabatin su mesun diseñadornan di clase mundial tambe.

    Esey no ta tur!  Atan Lee tabata un visionario y tabatin deseo enorme pa e certamen di Miss Universe bin tuma lugar na Aruba.  El a fula tera cerca e organizadornan, y nan a bise cu pa haci esey, Aruba mester tin equipo profesional avanza di TV pa por carga e certamen.  Como cu e tempo ey casi Telearuba no tabatin equipo cu ta cumpli cu esey, mesora el a busca alianza cu un canal grandi di Colombia, cu a duna OK y a hasta participa den un conferencia di prensa pa indica cu nan ta cla pa muda cu nan broadcast equipment pa produci Miss Universe.  Lamentablemente nunca e certamen a bin Aruba, y esey pa varios motibo.

   Sigur un monton di candidata por splica ta cuanto yudanza nan a ricibi di Atan Lee riba tur asunto, como cu e ta un persona cu semper ta habri porta pa tumabo como parti di su famia.

   ENTREVISTANAN:

  Su imagen tambe a plama internacionalmente via TV internacional, incluyendo un famoso cobertura cu un crew di E! Latino America cu a yega na su cas cu e Kuko Kunuku Paranda Bus, y e reportero kier a mira kico un Arubiano tin den su frigidaire.  Nan a drenta den cas di Atan Lee y un dama a habri frigidaire pa nan mira.  Despues e reportero a sigui bay mas dilanti y a haya Atan Lee sinta dilanti TV ta mirando Telenoticias.  Aki nan a djis cuminza cu un combersacion cune inespera, y Atan tabatin e contestanan perfecto!  Despues ta henter Latino America a mira e raportahe aki via E! Latino America.

   Esey ta tempo cu Atan Lee tabatin un compania di catering cu tabata duna turistanan cuminda cu ta bay riba e Tour ey.  Aki ta unda cu Atan Lee tambe a resalta durante su bida, cu varios restaurant na su nomber.  Sin lubida Paradise Restaurant na comienzo cu tabata un di esnan cu tambe a habri un drive-thru na Catiri.  Despues el a habri The Special Restaurant na Boegoeroei, y tambe despues na Bubali.  Finalmente a habri Peanuts Restaurant na Oranjestad cu a bira un gran hit tanto cerca hendenan local como turistanan.

   Na comienzo di decada 2000 tambe el a trece bida na e Penthouse yama ‘Cas di Nicki” den Caya Betico Croes, unda e piso mas na halto a sirbi pa hopi fiesta y actividadnan social.

   AUTOR CRIOYO:

   Pa mantene tur historia bibo, el a skirbi varios buki na Papiamento, incluyendo “Nos tur por siña” na 1995 cu a duna les na tur hende pakico no ta bunita pa pone tur bo braza completo riba un mesa ora di come, y tampoco di con bo no mag bay bisti na blanco ora cu bo ta atende un boda of un fiesta di matrimonio.

   El a publica tambe “Den scochi di mi mama” na 2002, “Politica un vocacion” na 2005, tambe “E shoko sabi” na 2013 cu tabata un buki pa mucha, tambe “E exito ta den bo man” na 2015, y tambe “Bregitte, het meisje uit Noord” na 2019.

   Atan Lee ta casa cu Olga Hernandez, y tin tres yiu, esta Gershwin Lee, Tai Foo Lee, y Atan Junior Lee.  Su ayudante Tia Lucia, y sin lubida su nietonan kendenan ta su gran amor semper, y e stima nan un mundo.  Algun aña pasa tabatin hasta informacion riba e posibilidad cu Atan Lee lo por a bira Gobernador di Aruba, y el a ricibi varios sostenedor pa e idea ey.

   Pero awor, Aruba ta tristo!  Su famianan ta tristo!  Tur persona cu el a duna un sosten den forma di conseho y educacion, lo bay sinti su falta.  Pesey mes, na famia-, amigonan, y tur conocir di Atan Lee, gerencia, staf y personal di DIARIO ta manda su mas profundo palabra di condolencia.  Atan Lee tin 74 aña di edad.  Cu luz eterno lusa pe.