Graduacion di Charlène Giselle Wever como Master of Business Administration na Universidad di Aruba

ORANJESTAD (AAN): Diasabra ultimo, Charlène Giselle Wever oficialmente a gradua Magna Cum Laude for di Universidad di Aruba cu un diploma di Master of Business Administration (MBA).

E programa aki tabata un colaboracion entre Universidad di Aruba y The University of South Carolina.
   Durante e programa aki, el a sigui cursonan manera 'Leadership & Ethics', 'Psychology of Effective Communication', 'Strategy & Organization', 'Corporate Finance', 'International Human Resource Management', 'International Marketing y Research Philosophy & Methodology' y a completa nan exitosamente.

   Den su segundo aña di e programa, Charlène a skirbi un tesis y a defende cu exito tocante e efecto di condicionnan psychosocial na trabou manera conflicto na trabou (por ehempel: bullying, menasa, acoso y acoso sexual) y demanda halto di trabou.
   Charlène a investiga e efecto di e condicionnan aki riba ausencia di trabou y intencion di kita for di trabou, loke ta trece gastonan halto pa organizacionnan na Aruba. Su investigacion a duna perspectivanan valioso pa mehora e condicionnan di trabou na Aruba y con pa reduci e intencion di empleadonan pa kita di trabou na Aruba.

   Ta importante pa nota cu Charlène a sigui e opleiding aki banda di su trabou fulltime como Project Management Officer, loke ta demostra su dedicacion, persistencia y etica di trabou. Cu su excelente prestacion y dedicacion, Charlène a mustra cu e ta cla pa duna un contribucion pa e mehoramento di e condicionnan laboral na Aruba. Masha pabien Charlène!