Golpi duro pa narcotrafico ora Ehercito Colombiano a confisca 10 ton di cocaina

PASTO: Den un operacion grandi di diferente departamento, riba Diamars na Colombia a logra di intercepta y confisca e lote di mas grandi di cocaina pa 2021.

  Esaki a socede na Departamento di Nariño cu ta keda mas pazuid di Cali, cerca di frontera cu Ecuador.

   Den e accion aki a destrui dos laboratorio cu ta procesa Cocaina, na municipio Samaniego.  Y den henter e operacion aki a confisca un total di 10.000 kilo di cocaina.  Esaki tin un balor di mas di 300 miyon Dollar, cu ta placa awor cu e grupo ELN a perde.  E grupo arma ELN ta responsable di e dos laboratorionan aki cu ta produci droga cu ta hinca yiu di hende den perdicion.  Nan a hasta haya cocaina scondi den Microwave Oven.

   A destrui mas di 10.000 galon di quimico liquido, y mas di 2.000 kilo di ingredientenan solido cu ta wordo usa pa crea cocaina, y cu ta pertenece na e compania Jaime Toño Obando di ELN.

   Nan a destrui tambe e machine y equipo cu ta wordo usa pa distribui e droga, cu tin destino un pais na Centro America.  Cu e destruccion aki, nan ta proteha e salud y seguridad di tur Colombiano.

   Fiscal General Francisco Barbosa a bisa cu e accion aki y confiscamento di droga a bin danki na e trabaonan investigativo contra ELN y nan fuentenan financiero ilegal den parti Zuidwest di Colombia, cu asina a duna autoridad un bista amplio, detaya, y completo di e structura criminal di e narcotraficantenan aki.

   Cu e 10 ton aki confisca den November, e total di droga cu a wordo confisca den 2021 te cu awor ta mas di 100 ton.