Gobierno y instructornan di landamento a firma contrato di trabao di cinco aña

Minister Endy Croes hopi satisfecho:

ORANJESTAD (AAN) – Na JFK Education Center a tuma lugar un conferencia di prensa, Diaranzon mainta, den cual Minister di Enseñanza, señor Endy Croes a firma contrato cu instructornan di landamento, pa un periodo di cinco aña.

            Tabata presente como invitado special señora Anne Marie Proveyer-Grot, director di Departamento di Enseñanza, señora Josephine Albertus, presidente di SIMAR, varios Instructor di Landamento y staf di e bureau di e mandatario.

            E dignatario ta considera esaki un momento hopi importante pa hopi di e instructornan y e ta kere sigur cu e tabata para dilanti un progreso. E no conoce tur instructor di landamento, pero el a mustra contento di sa cu e mayoria tabata presente na JFK Education Center.

            Minister Croes a referi na un tiki storia y a menciona cu dia 20 di September 2021 Gabinete Wever-Croes a huramenta, y e dia ey mes trabao a cuminza. E ta corda cu e prome yamada cu el a haya e dia ey tabata di Josephine Albertus y no obstante cu e mandatario no tabata tin un secretaria ainda, y apenas tabata formando su bureau, e presidente di SIMAR a persisti un poco pa un reunion. Na e di dos dia di trabao e mandatario a invita e dama drenta su kantoor, dal un coffie, aunke e no tabata tin su staf ainda.

            E cu señora Albertus a cuminza discuti basta punto, y e mandatario a pidie pa trece su puntonan di prioridad mas relevante. Minister Croes a señala cu manera tur hende sa, e no a haya un cartera facil, y den e caso aki un di e problemanan mas grandi tabata e instructornan di landamento, y a wordo pidi pa e punto aki wordo poni como prioridad number uno.

            E tempo ey, e instructornan tabata tin hopi aña trahando riba un contrato anual, cu ta caba cada Juni y ta wordo renova cada Augustus, pero e ultimo aña nan a wordo pusha door di ex-minister Lampe pa un contrato pa ora.

            E mandatario a pidi SIMAR un chens, pa e traha riba e situacion aki, y ya caba pa October a bolbe firma un contrato pa un aña cu tur e elementonan envolvi.

            Minister Croes a señala cu, mientras tanto, el a priminti cu lo bay mira con na otro manera, por yega na un tipo di contrato cu por beneficia nan. E mandatario ta compronde nan como ser humano; algun di nan entre 20 pa 25 aña ta trahando caba, y cu un contrato di un aña, no por bay ni banco pa cumpra un auto.

            E dignatario a bisa cu mas cu claro tabata tin caminda pa cana, el a pidi conseho di DRH, a uza ley di contabilidad, y por firma contrato pa cinco aña, entre otro. A tuma su tempo y e ta contento cu a haya consehonan positivo.

            Ora a acerca SIMAR pa nan firma un contrato di cinco aña. Tabatin e choice di hacie awo of sigui bringa Dios sa te ki tempo, segun e mandatario.

            E dignatario tin entendi cu mayoria di e instructornan ta di acuerdo pa firma un contrato di cinco aña, y Diaranzon 31 di September, e dia a yega pa firma un contrato prepara pa Departamento di Enseñanza, a wordo controla bek pa DRH, y nan a bin hunto pa yega na un status final, unda a firma un contrato di cinco aña.

            Minister Endy Croes ta contento cu nan por a yega na algo mas concreto y a subraya cu ohala den e añanan mas dilanti por concretiza esaki, mas formalmente ainda. El a expresa palabranan di pabien na e instructornan di landamento cu e logro aki.