Den un mundo riba su cabez y Hulanda den un situacion confuso
*Evelyn Wever-Croes ta pone Aruba den centro di Nacionnan Uni
*Servicio di gas por crea ruta navegacion nobo entre Aruba y Merca
ORANJESTAD (AAN) — Kico ta pasando na mundo? Ora busca un contesta pa e pregunta den panorama mundial, e pensamento ta nace cu mundo ta riba su cabez.
Generalmente ora mundo ta usa su man como pia, Aruba ta busca sosten di Hulanda cu na e momentonan aki ta den un situacion politico, cu tin hopi aparencia di un Babylon.
Manera DIARIO a relata siman pasa, e resultadonan di eleccion pa Eerste Kamer (Senado) Hulandes, a deshaci di tur grado di seguridad.
Cu por lo pronto Hulanda por produci basta dolor di cabez pa su mes y no mester di problema di parti di Aruba tambe, ta un hecho.
Den Guera di Ukraine, Putin awor ta menasa cu e ta hiba alarma nuclear Belarus y na diferente pais na mundo, manera na Francia, Gobierno ta problema.
Na e momento pues cu nos mes tabata mira cielo basta scur a base di tur loke ta pasa na mundo, Aruba tabata den centro di atencion na New York, caminda e conferencia di Nacionnan Uni a tuma lugar.
Pa prome biaha den historia, un Arubiano a dirigi reunion di Nacionnan Uni.
Aruba a wordo presenta na mundo dor di su lider, mr. Evelyn Wever-Croes, kende hunto cu Ministro Ursell Arends a representa Aruba na e Water Conference.
Mundo a haya oportunidad di mira e Prome Ministro di Aruba den accion y cumpli cu un tarea den cual su cualidad a bini dilanti.
Ta sumamente agradabel pa Aruba cu su Prome Ministro, tabata central den e reunion di Nacionnan Uni.
Pregunta ta, con Aruba ta sigui dilanti den un situacion mundial, manera for di Segundo Guera Mundial, mundo mes no a pensa cu por a presenta su mes.
Grato tabata e noticia pa Aruba cu Prome Ministro Wever-Croes no solamente a entrega mundo un imagen di gobernacion na Aruba, cu a sabi di hiba un lucha contra advertidad, pero tambe cu el a bolbe Aruba cu posibilidad nobo pa futuro.
Mientras a papia di awa na e conferencia di Nacionnan Uni, loke a pasa despues tambe ta sumamente interesante pa un analisis di loke Aruba por spera di e bishita di su Prome Ministro na Merca.
Creacion di entrada pa Aruba y trabou pa e Arubiano no ta dicidi solamente pa e awa cu hende por bebe pero tambe pa e pan cu e por come y e bida total cu e por hiba.
Den un analisis di loke e bishita di Prome Ministro na Merca tin como resultado pa Aruba, sigur ta importante e reunion cu el a sostene hunto cu Ministro Dangui Oduber na Jacksonville na Florida, caminda a reuni cu e compania Jaxport y firma un acuerdo preliminar.
Ora papia di Jaxport ta papia di e waf di container mas grandi di Florida. Jaxport ta interesa pa explora rutanan nobo pa carga entre Aruba y Merca pero na un prijs menos halto cu awor ta e caso.
Algo cu sigur ta sumamente interesante na un mundo afecta pa inflacion cu a percura pa aumento enorme di prijs.
Un acuerdo entre Aruba y Jaxport ta un paso importante den fortificacion di e terminal di cargo di Aruba, cu asina ta percura pa un adelanto economico importante pa Aruba.
Un acuerdo entre Aruba y Jaxport ta papia atrobe di e posibilidadnan cu terminal di gas ta representa pa Aruba.
Pa yega na un conclusion pues pa e biahe cu Prome Ministro Wever-Croes a haci pa Merca, mester tene consideracion cu varios factor den cual sigur ta keda central pa no mantene bista dirigi riba desaroyonan fastioso di mundo, pero pa den e situacion actual sigui mira e futuro pa cual mester lucha y cu ta e deber mas grandi di un lider local y internacional.
Si tin algo cu ta destaca den gobernacion di Prome Ministro Wever-Croes ta su capacidad pa na momento cu nubia ta tapa solo, no papia di tormenta pero di e momento cu solo ta bolbe sali y bida mester sigui na un forma mihor di loke e tabata.
