DIARIO ta haya razon den su posicion enfrente desaroyo Hospital
*E responsabilidad di Reino pa bienestar di e Arubiano confirma
*Parlamento tin un deber pa investiga placa gasta den Hospital
ORANJESTAD (AAN) — Un lucha tenaz ta loke DIARIO a hiba semper enfrente Salud Publico y den esaki e sector di Cuido Medico, cu ta central den bienestar di e ser humano.
Siman pasa e accion periodistico persistente di DIARIO a topa cu expresionnan negativo di parti di SOGA, e fundacion cu a wordo introduci dor di Gobierno Mike Eman den cuadro di e realisacion di e proyecto Hospital, cu tabata parti di e proyectonan di Bo Aruba cu segun e Tribunal di Cuenta di Aruba, Algemene Rekenkamer Aruba, a briya den fayonan exigi pa uso di placa di Pueblo pa proyectonan.
Cu problemanan serio lo presenta ta algo cu for di 2018 DIARIO a pronostica, despues cu e rapport riba proyectonan di Bo Aruba, porfin a haya chens di mira luz despues di a keda den e lachi di Benny Sevinger durante eleccion 2017.
Na 2023 e peligro grandi cu DIARIO semper a trece dilanti pa e mal preparacion di e proyecto Hospital, a rementa y un guera a start riba construccion y no construccion, mientras e asuntonan sagrado di Salud Publico, den cual Cuido Medico tin un lugar central, a wordo dera.
DIARIO a insisti cu e proyecto Hospital ta contra principionan di bon maneho di Salud Publico, di cual bida di hende ta depende directamente y como tal mester ta acesibel na tur momento pa tur ciudadano.
E forma cu placa a wordo gasta ya a haci hospital sumamente caro pa AZV, cu ta e seguro obligatorio di Aruba cu mester cubri practicamente tur gasto di Hospital, den un tempo di exigencianan creciente y cambio grandi pa cual DIARIO, cu conocemento di e materia, tin basta tempo ta prepra publico.
Durante fin di siman, Gobernador di Aruba, Su ExcelenciaAlfonso Boekhoudt, a bolbe skirbi historia na momento cu a bira conoci cu el a reuni cu e dos instancianan cu na prome lugar mester a wordo scucha, cu ta specialistanan y e sindicato di enfermeronan cu manera ta bini dilanti den e informacionnan oficial di Gobernador, ta e dos instancianan cu por duna bista real riba loke ta pasa na Hospital.
E reunionnan entre Gobernador di Aruba y e dos instancianan cu ta directamente encarga cu e funcionamento di Hospital di Aruba, centro di salud di Aruba, ta duna prueba di e importancia cu e materia tin pa e bienestar di e ciudadano Arubano, cu ta e lucha periodistico di DIARIO.
Su Excelencia Gobernador Alfonso Boekhoudt ta Representante di Rey y ta debe responsabilidad na e Gobierno di Reino sigur ora ta trata asunto di bienestar di e Arubiano como ciudadano di Reino Hulandes.
Un momento historico pa Aruba a keda registra ora e representante di Reino Hulandes y como tal parti di e Gobierno di Aruba, a invita e personanan directamente envolvi den e desaroyo di Hospital pa duna splicacion den loke ta pasa na Hospital.
Den su encargo, Su Excelencia Gobernador Boekhoudt no solamente ta mantene contacto cu Parlamento y Gobierno pero tambe entre otro cu organisacionnan local den su labor pa cuida e bienestar di e ciudadano Hulandes cu ta responsabilidad di Reino Hulandes.
E accion di Su Excelencia Gobernador Alfonso Boekhoudt, ta pa DIARIO tambe un sosten den e forma cu DIARIO a expresa preocupacion serio pa e bienestar directo di e Arubiano, cu tin como uno di e derechonnan democratico mas grandi, e derecho pa lucha pa su salud, pa su bida na tur momento.
DIARIO tin atencion total pa dos punto cu e ta atende sigur na e momentonan aki cu ta loke a bini dilanti oficialmente awor, cu ta camanan disponibel pa pashent y e placa cu mester ta disponibel no pa edificio di un “hospital di cinco strea” pero di un centro di crisis, cu sigur den calamidad mester ta prepara pa bira e defensa di bida di ciudadanonan di tur parti di Aruba.
Manera DIARIO a splica e proyecto Hospital a wordo ehecuta pafor di e presupuesto di Aruba, loke a haci dificil pa tanto Parlamento como Hulanda por a sigui di acerca kico a pasa cu e placa cu Pueblo a gasta pa hospital como su centro di salud.
Awe Parlamento di Aruba tin un deber, pa start un investigacion pa splica Pueblo kico a pasa cu e sumanan enorme di Pueblo cu a wordo usa pa un proyecto cu no ta entrega Aruba loke Aruba mester pa un bon Cuido Medico cu tin Hospital como su centro pa culminacion di asistencia medico na un pais.
Bida di e Arubiano a wordo pone directamente na peliger cu e proyecto politico y te awe DIARIO ta tras di informacion concreto cual organisacion internacional capaz pa reorganisa Cuido Medico y introduci un Hospital nobo of renoba Hospital segun exigencia experto, a wordo uza den e proyecto di HOH.
