Minister di Salud Publico Mervin Wyatt-Ras:
ORANJESTAD (AAN)-- Minister di Salud Publico, drs. Mervin Wyatt-Ras a splica den entrevista cu DIARIO, cu su Ministerio ta trahando e Ley nobo “KIG” pa percura acredita esnan profesional den tereno di salud, pa nan wordo reconoci.
KIG nifica “Kwaliteitsinstituut Gezondheidszorg”, pues Instituto di Calidad den Cuido di Salud. Su tarea principal ta mara na e leynan y reglamentonan local pa percura pa e calidad, normanan, y supervision den cuido di salud na Aruba.
“Pesey nos ta bezig cu e Landsbesluit pa garantiza cu por ehemplo, e profesionalnan den cuido tanto e enfermeronan y esnan cu ta traha den servicio di emergencia, por ta reconoci,” Ministro a bisa.
“Tur e Landsbesluit cu ta agrega na e ley di AruBIG mes, ta haci posible cu e profesional tin puntonan cu e por garantiza cu e ta un profesional di calidad. Nos ta bezig cu tur esakinan; e ta tuma tempo pasobra e Ley tin cu cana su caminda, e ta caba na Departamento Huridico, despues tin cu bay Parlamento keda un par di dia, y despues bin cerca nos. Nos tin protocolnan tambe cu a wordo firma cu docternan di cas y cu docternan specialista, protocolnan con ta referi pashentnan di docter di cas pa specialista, eseynan caba nos a firma y tin mas pa wordo traha, y tambe nos a cera un MOU cu diferente profesional pa adapta nan salario p’asina nan por duna un miho cuido tambe, pasobra un profesional, ora su entrada ta wordo garantiza, e ta traha cu mas smaak tambe.”
“Esey nos a haci ya caba den comienzo di aña y aworaki nos ta continua pa mehora e Ley pero tambe e calidad di cuido y Inspeccion su capacidad pa por atende tur e kehonan cu tin den comunidad”, e dignatario di Salud Publico a subraya.
