ORANJESTAD (AAN): Parlamento diamars ultimo a reuni cu Minister di Finansas Geoffrey Wever riba peticion di e minister. Minister Wever kier a
haya e sentimento di Parlamento riba cambionan cu e kier introduci pa hisa salario di directornan di companianan estatal. Algo cu e por haci sin problema basa riba e ley di ‘topinkomens’ actual, e ley di LNT. Ademas, gobierno AVP-Futuro a aplica e excepcion aki di aña pasa caba, pa director di Schiphol na AAA NV.
E reunion a haya un buelta hopi critico, na momento cu e minister, den su contestacion, a gaña Parlamento.
Den un conferencia di prensa extraordinario e mesun merdia miembronan di fraccion di MEP a elabora riba e violacion serio aki di parti di e minister.
Pa prome, e minister a gaña Parlamento cu el a evalua e ley existente caba, siendo cu no ta berdad. Y tur fraccion den Parlamento a bis’e cu e mester bay evalua di berdad.
Pa di dos, e kier a sconde tras di conseho di Departamento Huridico cu lo a conseh’e pa aplica un maneho favorabel “begunstigend beleid” siendo cu ningun caminda den e conseho esey ta inclui. El’a bolbe gaña pues.
Pa di tres, el a gaña cu e no por aplica e mesun excepcion cu el a duna Schiphol, riba e peticionnan di directornan local. Prome el a bisa cu e excepcion tabata incorecto, cu por cierto Gobernador a ancra den un decreto.
Despues cu MEP a haci’e pregunta al respecto, el a purba saca su curpa. Pues no un, pero tres mentira den un solo reunion di apenas 2 ora. Un minister cu ta gaña parlamento deliberadamente, no merece confiansa di un parlamento, pero merece un mocion di desconfiansa. Fraccion di MEP ta preparando esey pa dia cu e reunion continua.
