Instancia cu tabata yuda adictonan na Colombia
- Victoria pa Jean Paul van der Kuyp
- Kibramento di acuerdo basa riba ‘storianan’
ORANJESTAD (AAN): Tabata na September 2024 cu a sali den prensa e relato di un situacion relaciona cu e instancia pa yuda adictonan, esta ‘Corporacion Con Ánimo” na Colombia, y e decision di Gobierno e tempo ey pa manda busca tur pashent bek cu tabata ricibiendo tratamento na e institucion aki na Colombia.
DIARIO a haya sa cu un acontecimento recien hopi importante a tuma lugar. A sali na cla cu Corporacion Con Ánimo a entabla un caso contra Gobierno di Aruba, y a gana esaki tambe den Corte di Husticia.
E informacion cu a plama e tempo aya, a trece un nubia scur riba e organizacion aki cu mas bien tabatin un impacto considerabel riba nan bon nomber y reputacion. Pero awor ta sali na cla cu Corte di Husticia a dicta na fabor di Corporacion Con Ánimo aki.
Acuerdo di 4 aña: Abogado mr. G.M. Sjiem Fat a representa Corporacion Con Ánimo den e caso contra Gobierno. Aki a bin sali na cla cu desde 1 Januari 2023 a drenta den un acuerdo di cuido pa 4 aña, cu lo finaliza dia 31 di December 2026. E ta un acuerdo di atencion medico dirigi na pashentnan cu tin necesidadnan complica di salud mental pa cual no ta existi cierto forma di atencion medico disponibel na Aruba. E acuerdo ta consisti di formamento di un Comision di Indicacion. E comision aki ta consisti di funcionarionan di Gobierno y ta dicidi riba mandamento di pashentnan “den un lugar intramural na un pais pafo di Aruba”. E cuido ta wordo duna pa Corporacion Con Animo na Colombia.
Articulo 6 di e Contract di Cuido, ta inclui cinco modalidad den cual por stop y finaliza un cuido individual di un pashent. Un di e modalidadnan ta describi asina: (B) A logra yega na e metanan (di tratamento), manera cu nan a wordo describi den e Algemene Voorwaarden). Otro posibilidad ta: (D) Opzegging di ambos partido, cu un tempo di preaviso di 6 luna of cualkier otro termino riba cual ambos a bay di acuerdo cu ne.
Articulo 6.4 ta indica cu “Si stop cu cuido di un individuo, e ora e instancia cu ta duna servicio ta encarga pa colabora cu e regreso di e cliente pa Aruba manera indica den Algemene Voorwaarden. Articulo 6.5 ta indica cu “den caso di incumplimento di e obligacionnan den e contract aki, Gobierno ta reserva e derecho di revoca un indicatiebesluit of kibra e contract”. Articulo 7.4 ta establece, esencialmente, cu si acaso no tin Indicatiebesluit, e ora e costo di cuido lo no cay na cuenta di Gobierno. Bao di e titulo ‘Fraude y incumplimento” ta establece un reglamento den caso di fraude.
Aki ta poni tambe: Articulo 9.4: Si acaso Corporacion Con Animo no ta cumpli cu un of mas obligacion stipula den e acuerdo aki, of si acaso constata un hecho manera ta describi den Articulo 9.1, e ora Gobierno lo notifica e instancia di e incumplimento, manera cu ta poni den Algemene Voorwaarden.
Na 9.5 ta poni cu notificacion pa incumplimento ta wordo haci por escrito, dunando Corporacion Con Animo un plazo razonabel pa cumpli cu su obliugacionnan. E plazo aki tin caracter di un termino fatal, bao e titulo di ‘Overgangsbepalingen”.
Na 12.1 ta poni cu Corporacion Con Animo lo sigui duna servicio na e clientenan, cu na comienzo di e contract aki, ya tabata ricibiendo atencion di nan banda, y e atencion aki lo sigui di ta garantiza, apesar di un posibel ausencia di un Indicatiebesluit.
Articulo 13.8 ta establece cu e Contract di Atencion Medico por wordo finaliza door di ambos banda. Pero prome cu e termino acorda di fecha, e acuerdo di cuido por wordo finaliza solamente den caso cu e proveedo di servicio medico (den resumen) ta den estado di insolvencia of ta menaza di yega pa eynan, si e proveedo di servicio cera su negoshi of si e empresa wordo adkiri, ta fusiona, of dividi.
Articulo 13.9 ta indica cu si acaso Gobierno den casonan menciona den articulo 13.8 ta stop mesora cu sigui cu e acuerdo, cu e ora e proveedo di servicio ta obliga na compensa pais Aruba pa cualkier daño cu bin for di e terminamento. Pais Aruba lo no debe e proveedo di servicio ningun compensacion riba ningun base pa e terminacion di e acuerdo aki, sin importa e forma cu el a socede.
Den Algemene Voorwaarden ta indica cu si Gobierno stop cu e acuerdo, cu e atencion pa e pashent ta sigui sperando un indicatiebesluit nobo, of te ora cu e pashent tin di regresa Aruba. Articulo 8 ta menciona cu Gobeirno mag di manda personal pa haci inspeccion sorpresa of exigi nan duna cuenta pa garantiza cu ta haci control di calidad.
Acusacionnan Falso: Dia 2 di September, Ministro di Husticia y Asuntonan Social a firma 14 Ministeriele Beschikking despues di a ricibi mes hopi Indicatiebesluiten, pa asina stop tur cuido individual dia 5 di September 2024 y manda bek e pashentnan riba cual nan nomber ta aparece riba cada Beschikking.
Den carta di 17 di September 2024, Ministro ta informa Corporacion Con Animo cu enbista di e hechonan grave y circunstancianan menciona, y di e gravedad di e deficiencianan, a bin cu un kiebro total di confiansa, cu ta habri lugar pa un incumplimento di pleno derecho, ya cu segun e principionan di razonabilidad y equidad, ya no por spera cu Gobierno ta sigui cu e contract aki, y cu esaki ta wordo poni directamente na un stop. Gobierno ta bisa cu Corporacion Con Animo no kier a duna copia di e Beschikkingen na e clientenan, y no kier a coopera pa yuda pa nan regreso pa Aruba, y pesey 7 pashent a keda atras.
Pero dia 24 di Juni 2025, abogado a manda carta unda Corporacion Con Animo a notifica Gobierno cu e kiebro di e Acuerdo a socede debi na motibonan falso of fingi. Ni a duna nan un chens di defende nan mes. Tampoco a duna CCA un plazo razonabel pa drecha cualkier incumplimento. CCA a sali di e punto di bista cu Gobierno lo sigui cu e Contract di Atencion Medico.
Pesey den Caso Sumario aki den Corte, nan a pidi Hues pa declara nulo e kiebro di e Acuerdo di Cuido di 17 di September 2024, y tambe pa indica cu e Contract ta sigui valido, te ora cu na un forma legal esaki wordo finaliza. Nan kier pa Gobierno keda paga pa e 7 clientenan cu no kier a regresa Aruba, y haciendo uzo aki di Articulo 6. A pidi Hues pa a sigui paga como 2.500 Dollar mensual y tambe costo di viahe y costo di remedi, na e demas cuido (segun articulo 7 di e contract), y cu calculonan te cu 31 di Augustus 2025 a wordo calcula na 389.135.79 Florin.
Gobierno di su banda ta pidi Hues declara e demanda nulo, y cobra gasto di e proceso.
Sentencia di Caso: Durante tratamento di e caso, Corte a tuma nota cu ningun rato Gobierno no a notifica Corporacion Con Animo di “informacionnan preocupante” tabata drentando, y ni a bay haci un “bishita inespera” na Colombia pa investiga tur esaki, y papia cu cada pashent. Siendo cu esaki por wordo haci segun e Acuerdo di Cuido cu a ser firma.
Corte ta mira aki pues cu Gobierno no tabatin suficiente prueba pa asina bay asina leu di kibra e Acuerdo di Cuido. Esaki berdad no ta motibo di stop e cuido, y no a haci uso di e termino adecuado pa purba drecha cualkier situacion cu lo por existi. Tampoco cu por kibra e contact cu e acusacion cu Corproacion Con Animo no por a regla “documentonan medico” pa nan viaha bek pa Aruba, pues e no ta hopi pisa pa hustifica kiebro di contract.
Corte ta di opinion cu Corporacion Con Animo a sigui duna cuido medico na e 7 pashentnan cu a keda atras basa riba Acuerdo, cual ta indica cu Gobierno tin di financia e cuido medico aki.
Tambe Corte a nota cu tin declaracion di pashentnan cu a regresa cu a duna nan declaracion, pero nan no a tuma ningun declaracion despues di e 7 pashentnan cu si a keda atras, y cu Gobierno no a haci ningun investigacion riba status di e siete aki.
Hues a dicta sentencia, indicando cu Gobierno su derecho pa kibra e Acuerdo, esaki no ta stop gasto di e 7 pashentnan cu a keda atras, pues ta keda valido pa cubri nan gasto, te ora e Acuerdo wordo finaliza na forma legal.
Pesey a ordena Gobierno pa paga Corporacion Con Animo e suma di 389.135,79 Florin. Tambe a dicta pa Gobierno paga tambe e tarifa di US$ 2.500 pa luna pa cada pashent di e siete cu a keda atras, cu ta palabra den e Acuerdo di Cuido.
Tambe a ordena Gobierno pa paga gasto legal di Corporacion Con Animo cu ta 225 Florin pa costo di oproeping, 7.000 Florin na placa di Griffier, y 6.000 Florin pa nan abogado.
