Pa di tres aña consecutivo
ORANJESTAD (AAN): Aruba Bank ta orguyoso di continua su sosten na Fundacion Anti Droga Aruba (FADA) pa di tres aña consecutivo, reafirmando un compromiso comparti cu salud mental, bienestar y famianan mas fuerte den comunidad Arubano.
E aña aki, Aruba Bank lo sostene FADA su “Interactive Family Conference”, bou di e tema “ONE FAMILY.” E evento enfoca riba comunidad tin como meta pa fortalece conscientisacion tocante salud mental, comunicacion y bienestar emocional den famia, pa medio di informacion profesional, experencianan real di bida, workshopnan interactivo y hermentnan practico pa mehora comunicacion.
E colaboracion aki ta alinea directamente cu dos di Aruba Bank su pilarnan strategico: WeCare y We Build. Cu WeCare, Aruba Bank ta reconoce e importancia di contribui na bienestar di e hendenan y comunidadnan cu nos ta sirbi. Cu We Build, banco ta comprometi pa contribui na un Aruba mas fuerte y resiliente, door di inverti den iniciativanan cu ta crea un impacto positivo y duradero den nos comunidad.
“Salud mental y bienestar ta necesidadnan importante den nos comunidad. Door di continua nos colaboracion cu FADA, nos kier yuda crea mas conscientisacion, stimula conversacionnan habri y ofrece famianan oportunidad pa conecta y crece mas fuerte hunto,” segun Edseline Leer – Semeleer, Head of Retail Banking di Aruba Bank.
E evento lo enfoca riba conexion, comunicacion, prevencion, seguridad emocional, resiliencia y sanacion hunto, den un ambiente special y di sosten unda famianan por siña y participa hunto.
Aruba Bank y FADA ta invita famianan y henter comunidad pa participa na e evento di e aña aki y forma parti di e conversacion importante tocante salud mental y bienestar emocional.
Hunto nos ta cuida. Hunto nos ta construi famianan mas fuerte, mentenan mas fuerte y un Aruba mas fuerte.
