Minister di Finanzas Xiomara Maduro:
*A compila e datonan y e ta na CAft pa conseho
ORANJESTAD (AAN) – Diahuebs mainta a tuma lugar e conferencia di prensa di Gobierno, cu un presentacion realiza pa Minister di Cultura y Finanzas, Xiomara Maduro.
E mandatario a duna un actualizacion financiero, y tambe a referi na e tema di BBO na Frontera. Minister Maduro a cuminza pa informa cu e presupuesto 2024 a keda compila, ta cla y a sali pa CAft dia 22 di Juni en curso, pa ricibi su conseho.
E dignatario a indica cu gobierno ta trahando pa por entrega e presupuesto 2024 tambe na ora. Pues, prome cu dia 1 di September di e aña, na Parlamento, pa e presupuesto aki keda trata.
Aworaki, gobierno ta wardando e conseho di CAft, y esaki por ta den e siman di 10 pa 14 di Juli, cu lo haya e contestanan ey, nan lo haci cambionan si ta necesario, pa asina por presenta e ley aki na Raad van Advies na fin di Juli, di e aña aki.
E mandatario a subraya cu importante ta cu ora RvA tuma su tempo pa duna su conseho, e lo bin bek pa gobierno y asina cu e adaptacionnan cu tin mester por entrega e presupuesto na Parlamento, prome cu 1 di September.
“Di eynan Parlamento tin tres ultimo lunanan di aña 2023, pa asina por trata e ley aki, pa nan hiba e debate publico, y asina aki nan por aproba e ley. Un bez aproba, esaki ta wordo publica, y nos lo por bolter e aña teniendo un presupuesto atrobe, cu ta na ora, pasobra presupuesto 2023 nos a entregue prome cu 1 di September y nos a drenta e aña aki cu un presupuesto cla caba, pa nos por a traha. Y nos ta haciendo nos esfuerzonan aki pa mescos pasa cu 2024”, Minister di Finanzas, Xiomara Maduro a señala.
