CARACAS: Tabata riba e fecha 29 di Juni 1919, net ora e tabata hibando remedi na un pashent malo, cu Dr. José Gregorio Hernández a wordo atropeya pa un auto den e zona di La Pastora.
El a cay y a golpia su cabez contra e rand di acera, cu a causa un fractura na su craneo. Mesora a hise di eybao y a bay cune pa Hospital Vargas.
Net e ora ey na e Hospital, no tabatin ningun Docter, y e ora nan a core busca Luis Razetti. Pero ora cu nan a yega Hospital, a topa cu e capellan Tomás Garcia Pompa kende a informa cu Dr. José Gregorio Hernández a fayece, cu 54 aña di edad.
Razetti a firma e acto di morto. Riba e certificado aki, ta menciona cu ademas di e fractura na e base di craneo, e tin un herida leve na e parti patras di su wowo drechi, mey-mey di orea y su frenta. E tabatin un rasca tambe eynan.
Na bida e tabata conoci pa su bondad, y su dedicacion ferviente pa alivia e sufrimento humano. Pesey el a bira conoci como e “Docter di Pobernan”, yiu homber di Benigno Hernández Manzaneda y di Josefa Antonia Cisneros Monsilla, unda el a bay scol basico na Trujillo te cu su 13 aña di edad ora cu el a muda pa Caracas.
E tabata un studiante y Docter cu a sobresali, y a gradua cu un grado di Bachelor’s den filosofia na 1884. El a drenta Universidad Central, unda el a obtene e titulo di Medico dia 28 Juni 1888. Despues el a sigui pa estudionan di post grado na Europa y a regresa Venezuela unda el a haci contribucionnan grandi na e practica y dunamento di les den medicina na e pais.
Despues di hopi aña di debate pa reconoce su milagronan cu lo por pone bira un Santo, na 2021 recien Papa Francisco a reconoce un milagro cu a hise awor na condicion di beato.
E fama di e santidad di e futuro Santo, a cruza fronteranan rond mundo, specialmente pa personanan cu ta pidi pa su intervencion milagroso cerca esnan cu ta sufri di quebrante di salud, den e tribulacionnan di malesa, y ora cu tin menaza di morto.
