Gobierno ta prepara un alivio fiscal di Afl. 2.5 miyon pa limita impacto di aumento di gasolin y diesel

Minister Geoffrey Wever:

ORANJESTAD (AAN): Pa enfrenta e presion creciente cu aumento di prijs di combustibel ta pone riba e cartera di famianan y empresanan na Aruba, Gobierno, bou di responsabilidad di Minister di Finansa, Asunto Economico y Sector Primario, Geoffrey Wever, a dicidi di interveni un biaha mas pa limita e impacto di e aumento significativo di prijs di gasolin y diesel cu lo drenta na vigor dia 14 di october.

Pa evita cu e aumento aki cay directamente riba e consumidor y sector empresarial, Gobierno lo absorbe e aumento mediante un subsidio di aproximadamente Afl. 1 miyon pa e luna aki y pa un total di Afl. 2,5 miyon te cu fin di 2026. E suma aki ta menos cu lo cual cu Gobierno kier a yuda cune, pero si ta lo cual cu na e momento aki tin espacio p’e y cu ta prudente pa haci.

E intervencion ta forma parti di e esfuerzo continuo di Gobierno pa proteha poder di compra di su pueblo, limita presion riba costo di bida y sostene stabilidad economico di Aruba. Nos por recorda cu Gobierno AVP-FUTURO desde cu a drenta gobierno na 2025 a baha e accijns cu 10 cen pa liter, durante lunanan di april pa juni 2026 a duna un subsidio di Afl. 10 miyon pa mitiga e subida di prijs di gasolin y awo ta yuda un biaha mas cu loke por.

Segun e cifranan oficial di Departamento di Asunto Economico, Comercio y Industria (DEZHI), entrante 14 di october 2026 prijs di gasolin premium inicialmente  lo a subi cu 24.3 cen pa liter, alcanzando Afl. 3.161. Cu e subsidio di Gobierno e prijs nobo di gasolin lo bira Afl.3.124 pa liter (subida di 7%). Diesel inicialmente lo a subi cu 31.3 cen pa liter, alcanzando Afl. 3.413 pa liter. Cu e subsidio di Gobierno e prijs nobo di diesel lo bira Afl. 3.376 pa liter (subida di 8,9%).

E desaroyo aki ta demostra con Aruba, como un economia chikito cu ta depende di importacion, ta keda exponi na fluctuacionnan di prijs riba mercado internacional. Aumento di combustibel no ta afecta solamente automobilistanan, sino tambe transporte, distribucion di mercancia, actividad comercial y eventualmente prijs di diferente producto y servicio.

Pa e motibo aki, Minister Wever ta enfoca riba un intervencion fiscal dirigi pa alivia parti di e aumento y reduci su impacto riba consumidor y sector empresarial.

Departamento di Aduana a prepara calculonan pa un reduccion di accijns riba gasolin y diesel, basa riba un espacio fiscal di Afl. 1 miyon pa e luna aki y Afl. 2,5 miyon total te cu fin di 2026. E analisis ta contempla diferente manera pa distribui e alivio, incluyendo un reduccion igual pa liter di tur dos combustibel of un distribucion cu ta ofrece mas alivio na diesel.

E ultimo posibilidad ta particularmente relevante pa actividadnan economico cu ta depende fuertemente di diesel, manera transporte y distribucion di producto. Un aumento den costo di transporte por eventualmente afecta prijsnan den tienda y, consecuentemente, presupuesto di cada hogar.

E obhetivo di Gobierno ta pa busca un balans entre alivio pa ciudadanonan, sosten di actividad economico y maneho responsabel di finansa publico.

Minister Wever ta reconoce cu aumento tras di aumento di combustibel por pone presion adicional riba e presupuesto di famianan, particularmente esnan cu tin menos espacio financiero pa absorba subida di gastonan inespera.

Pa e motibo aki, Gobierno ta sigui evalua maneranan concreto pa reduci impacto di e cambionan externo aki riba economia local. E enfok ta combina atencion social cu responsabilidad fiscal: brinda alivio unda ta necesario, sin perde control riba e finansa di pais.

E intervencion ta particularmente importante den un periodo cu desaroyonan internacional ta sigui crea incertidumbre den costo di energia y transporte.

E iniciativanan fiscal cu ta wordo prepara ta conecta cu e pasonan anterior di Gobierno pa mitiga impacto di aumentonan di energia y combustibel. Den e Voorjaarsnota 2026, Gobierno a pone recursonan disponibel pa enfrenta e presion economico causa pa desaroyonan internacional.

E linea di maneho ta consistente, no laga fluctuacionnan internacional afecta e consumidor local, sin evalua e posibilidadnan cu Gobierno tin pa interveni di manera concreto, sostenibel y financieramente responsabel.

Cu e intervencion proyecta di Afl. 1 miyon pa e luna aki, Gobierno ta trata na crea un alivio adicional den un momento cu cada aumento di gasto por haci diferencia den presupuesto di un famia of den operacion diario di un empresa.

Minister Wever ta enfatisa cu proteccion di poder di compra, sosten di actividad economico y stabilidad di finansa publico mester sigui bay man den man. E proximo stap ta finalisa e forma di aplicacion di e alivio fiscal, di manera cu su efecto por wordo comunica cu claridad na pueblo di Aruba.