Minister Presidente Wever-Croes:
ORANJESTAD (AAN) – Minister Presidente a duna un actualizacion di e situacion di Covid-19 na Aruba, dialuna mainta den conferencia di prensa.
E dignatario a reitera cu e cifranan ta wordo publica aworaki, un biaha pa siman y datonan di Diabierna ultimo, ta mustra cu localmente tin 701 caso activo di Covid-19, mientras cu e siman prome tabata 326 caso. Kiermen cu den un siman a mas cu redobla e cantidad di casonan. Un total di 216 persona a fayece, di cual tin 3 caso mas cu e siman prome. E dignatario tin entendi cu ta trata di personanan cu ya caba tabata tin problema di salud.
E datonan aki ta mustra cu tin 134 caso nobo pa dia y un positive rate di 46% y esaki tin gobierno preocupa. Tin diez persona hospitaliza, di cual un so den Cuido Intensivo. Siman pasa tabata tin 4 persona so hospitaliza.
E hecho cu tin un persona so na ICU y cu e cantidad aki a keda hopi stabil, den ultimo simannan, ta mustra cu Aruba tin un situacion ainda bao di control. Sinembargo, Premier Wever Croes, ta indica mirando cu e cantidad di casonan ta aumentando, den nomber di Crisis Team gobierno kier alerta comunidad, pa tuma e pasonan necesario pa por reduci e transmision di Covid-19.
“No warda gobierno bin cu medidanan pa cuida bo, pero esaki ta e momento cu nos ta pidi abo pa cuida bo mes y bo famia”, e dignatario a acentua.
El a splica cu, cu un persona so den Cuido Intensivo, gobierno no tin e base legal pa impone medidanan di ley pa bay controla y parti boet si hendenan no ta cumpli cu nan.
“Pesey mi ta para akinan pa pidi bo mescos cu mi a haci na 2020 pa abo cuida bo mes y cuida bo famia” Minister Presidente a reitera.
Datonan ta indica cu esnan cu awo ta den e grupo di 701 ta den e average di edad di 40 pa 50 aña, cu no ta wordo considera un edad hopi halto y no di riesgo. “Sinembargo, nos ta mirando si, cu edad ta bahando y ora edad baha e ta bay den edad di nos mucha y hobennan, y nos sa cu hopi facil esaki ta wordo transmiti riba adultonan, specialmente esnan cu ta vulnerable pa nan salud, y pesey nos ta preocupa”, Prome Minister a enfatiza.
Pa reduci e cantidad di casonan, e mandatario a señala cu tur ciudadano sa kico mester haci, y Minister Presidente a menciona varios recomendacion un biaha mas, cu por lesa den un articulo apart.
