Gobierno ta para pa competencia husto tambe pa loke ta Telecomunicacion

Minister Geoffrey Wever:

ORANJESTAD (AAN): Pa loke ta telecomunicacion, Aruba tin dos compania grandi. Un cu ta e compania estatal cu ta SETAR y Digicel cu ta un compania priva. Na varios ocasion el a menciona cu gobierno ta para pa competencia husto.

            Pa e motivo ey mes ta bezig ta implementando 'Aruba Fair Trade Authority' pasobra ta kere den un competencia husto pa trece miho prijs y servicio pa e consumidor. Esey ta e obhetivo principal, a remarca.

            Cada empresa ta liber den e mercado aki y nan ta competi cu otro y esey e ta kere ta bon. A agrega cu SETAR ta haciendo inversionnan hopi grandi pa keda relevante y 'up-to-date' cu tecnologia.

            E como minister ta haya e presupuesto pa aproba y ta wak cu inversionnan grandi ta wordo haci. Nan semper ta inverti. No ta solamente un compania cu ta genera placa y paga gobierno. E 'return' cu gobierno ta haya di SETAR den cierto sentido no ta asina hopi. Pero e inversionnan cu ta wordo haci ta cuantioso y necesario, a señala.

            Wever a sigui bisa cu SETAR a bin cu un proyecto di 'fiber' pa ful Aruba. Ta trata di proyectonan hopi grandi. E conectividad di Aruba cu mundo ta nifica un inversion di miyones.

            Recientemente tambe a bin cu e programa di 'pick & choose' caminda cu e cliente mes por dicidi si e kier solamente internet na cas of solamente cable of e kier e combinacion. Anteriormente, a bisa, tabata tin mester di tin cable pa por tin internet y por ta bo no ta uza cable mas. Aworaki tin e plan aki caminda cu por scoge e productonan desea, segun necesidad y costo.

            Esaki ta cosnan positivo, a remarca.

            Banda di esaki tin un linea habri cu e competidor di SETAR cu ta Digicel y ta combersa cu nan riba cualkier desaroyo nobo cu nan kier bin cu ne. E ta indica cu como Minister di Telecomunicacion mester haci esey ya cu no por privilegia un riba otro.

            Na Aruba tin un sistema legal caminda cu hendenan por aplica pa 'vergunning' y ora cu esakinan wordo entrega ta trata nan cu tur transparencia y igualdad, cual ta hopi importante pa ora un compania di afo bin inverti cu e ta haya un trato husto di gobierno, Minister Geoffrey Wever a expresa.