Gobierno ta firma e registro di condolencia en conexion cu fayecimento di Su Mahestad Reina Elizabeth

ORANJESTAD (AAN): Dialuna mainta 12 di september, Prome Minister Evelyn Wever-Croes, acompaña pa Minister Xiomara Maduro, Minister Endy Croes y Parlamentario Ricky Hoek,

a firma e registro di condolencia cu Consul di Inglatera a pone disponibel na VNO y asina den nomber di Gobierno di Aruba, mustra respet y expresa palabranan di profundo condolencia.

            Durante conferencia di prensa di Gobierno di Aruba dialuna mainta, Prome Minister a expresa palabranan di condolencia pa cu e fayecimento di Su Mahestad Reina Elizabeth diahuebs ultimo expresando cu Reino Uni y paisnan rond mundo ta lamenta e perdida aki.           Hopi ciudadano di Aruba tambe a lanta conociendo e como e Reina. E tabata un fuente di inspiracion pa hendenan tur caminda rond di mundo y aki na Aruba tambe. Mas tanto pa su sentido di compromiso, su resiliencia cu e tabatin y e amor grandi pa su pais.

            “Reina Elizabeth tabata un simbolo di continuidad y trankilidad den e mundo cu ta cambia cada rato. Den nomber di Gobierno di Aruba y e pueblo di Aruba, nos ta expresa nos palabranan di profundo condolencia na Su Mahestad Rey Charles, na demas miembro di famia Real y na henter e comunidad di Reino Uni. Cu Reina Elizabeth sosega na pas.