Minister Mervin Wyatt-Ras:
ORANJESTAD (AAN): Minister Mervin Wyatt-Ras a informa cu Gobierno ta evaluando diferente opcion pa brinda atencion mas adecua na personanan cu ta biba riba caya y cu ta enfrenta un combinacion di adiccion y problema di salud mental.
Segun e minister, apesar cu Centro Colorado, bao maneho di Stichting Hunto, tin capacidad pa mas persona, falta di personal ta keda un di e retonan principal pa por amplia e servicio. Ademas, el a bisa, Stichting Hunto ta funciona principalmente cu voluntarionan y ta concentra su atencion riba personanan cu problema di adiccion y no necesariamente ta deal cu personanan cu tin condicionnan psikiatrico of psicologico compleho.
Minister Wyatt-Ras a splica cu, si tabata posible pa haci uzo di e servicio di Stichting Hunto pa atende e grupo aki, Gobierno lo a haci esaki. No obstante, e situacion ta exigi atencion di inmediato.
“Tin persona cu ta lucha cu adiccion y, na mes momento, cu problema psikiatrico of psicologico. Stichting Hunto ta atende principalmente adiccion, mientras cu Respaldo ta enfoca riba problema psikiatrico, pero no necesariamente riba adiccion. Como resultado, algun cliente no ta cay completamente bao di e criterio di ningun di e facilidadnan existente,” e minister a indica.
Pa atende e reto aki, Gobierno ta explorando un modelo mas integra y structura, cu por reuni e diferente tipo di asistencia necesario. E meta ta crea un sistema caminda personanan cu necesidadnan multiple por haya guia, tratamento y sosten adecua. Minister Wyatt-Ras a remarca cu Gobierno ta sigui busca un solucion sostenibel pa e problematica aki.
“Tur hende tin derecho na atencion y sosten. Un persona cu tin adiccion of cu ta biba riba caya no tin menos derecho cu otro. Gobierno tin e responsabilidad di facilita e yudansa necesario, pero como comunidad nos tur tin cu cuida nos ciudadanonan, sin importa ken nan ta y nan situacion,” Minister Wyatt-Ras a conclui.
