Awe den programa special na TV --- ORANJESTAD (AAN): Dia 13 di November 2020 Gobierno di Aruba a firma un acuerdo cu Hulanda riba e asina yama Landspakket.
Den cuadro di e contenido di esaki, Gobierno di Aruba lo presenta un programa informativo awe, dialuna 15 di november 2021 a traves di Telearuba y Canal 22.
Den e documentario lo refleha bek riba e tempo cu a firma e acuerdo, unda nos ta para awor, y kico nos por spera pa futuro. Lo elebora riba e efecto y consecuencianan den cuadro di covid y e condicionnan cu Gobierno di Aruba a implementa pa garantisa salud publico.
Prome Minister Evelyn Wever-Croes lo splica tocante e negociacionnan cu Hulanda, mientras cu tabata maneha e crisis, recuperacion, turismo y mas. Minister Xiomara Maduro lo elabora tocante e consecuencianan economico y financiero y Minister Glenbert Croes lo amplia riba e tema di Fase y diferente ayudo cu Gobierno a brinda comunidad. Señor Edwin Jacobs di SVB lo splica tocante e loonsubsidie y e hecho cu a yuda miles di hende cu a perde trabou y señora Ronella Croes di ATA lo trata e tema di pronostico pa turismo y recuperacion di e sector turistico.
Di e forma aki Gobierno di Aruba kier a percura pa brinda henter comunidad informacion transparente riba e tema importante di Landspakket.
Prome Minister den nomber di Gobierno di Aruba ta invita henter pueblo di Aruba pa sintonisa e programa special aki awe, dialuna 15 di november na Telearuba pa 7:00 pm y na Canal 22 pa 8:35 pm.
