Prome Minister Wever-Croes ta reacciona riba e declaracion di OPPA:
ORANJESTAD (AAN): Recientemente, sindicato OPPA a haci un declaracion cu ta duna e impresion cu Gobierno no ta duna atencion na e preocupacionnan di e pensionadonan. Den conexion cu e declaracion aki, Prome Minister Evelyn Wever-Croes ta reaciona cu e informacion aki no ta corecto.
Desde inicio di Gabinete Wever-Croes I, e preocupacionnan di e pensionadonan a wordo scucha y adresa, y esaki tambe ta e caso aworaki den e periodo di Gabinete Wever-Croes II. A inlcui e maneho riba e tereno aki, den e programanan di ambos Gabinete y a tuma diferente decision den e ultimo 6 añanan den beneficio di pensionadonan.
Manera por a tuma nota recientemente, Gobierno a baha e tarifa di impuesto pa e pensionadonan, a introduci un cobransa separa den caso di pensionadonan casa, a bolbe aumenta e pensioen di biehes pa di 3 biaha, y mucho mas decisionnan a wordo tuma den beneficio di e pensionadonan. "Pa Gobierno di Aruba, bienestar di e pensionadonan ta un prioridad," Prome Minister a expresa.
Dia 9 di februari, Prome Minister a contesta e ultimo carta di OPPA data 30 di januari, den cual a bolbe informa OPPA cu e 50% cu e pensionadonan a sacrifica durante di e pandemia no por wordo restitui. Esaki tambe ta e caso pa cu e 12.6% cu e empleadonan publico a sacrifica y e 25% cu e minister y parlamentarionan a sacrifica. Esakinan tabata contribucionnan di solidaridad durante un temporada hopi dificl. Esaki ta un topico cu Prome Minister a informa sindicato OPPA caba na varios ocacion.
OPPA tambe a pidi pa e compensacionnan pa trahadonan di Gobierno. Aki Prome Minister a informa OPPA cu e discucionnan riba e tema aki pa e periodo despues di 2024 no a cuminsa ainda. Na momento cu esaki cuminsa, OPPA lo wordo informa y lo ta envolvi den e discucionnan cu sindicatonan.
