Cu nombramento di CEO nobo
ORANJESTAD (AAN): E siman aki Gobierno di Aruba a confirma un fase nobo di stabilidad y profesionalismo na Aruba Airport Authority (AAA) pa medio di e proximo nombramento di un CEO nobo y e cooperacion renoba cu Royal Schiphol Group. Esaki ta marca e fin di e incertidumbrenan recien y ta posiciona e aeropuerto pa acelera e etapa di expansion di Gateway 2030.
Aunke lo publica e nomber di e CEO despues di firmamento formal, Gobierno a enfatisa cu e lider nobo ta trece experiencia fuerte di aeropuerto y infrastructura internacional. Bou di e cuadro di LNT, e rol di CEO lo opera tambe na e nivel di costo anual total mas abou den historia di AAA, significantemente bou di e paketenan di compensacion anterior y completamente alinia cu e normanan nacional di husticia y transparencia.
Gobierno a aclarea cu Aruba ta keda 100% doño di aeropuerto. E acuerdo cu Schiphol ta un colaboracion, no un benta, dunando AAA acceso na experticio mundial, gobernacion moderno, y sosten operacional mientras cu Aruba ta mantene control di tumamento di decision.
Gateway 2030 awo a drenta su fase mas intensivo na capital y sensitivo na riesgo. Un partner internacional fuerte manera Schiphol ta brinda confianza vital na e prestamistanan, e aerolineanan, e inversionistanan, e empleadonan y e biaheronan mientras Aruba ta acelera e proyecto.
E candidatonan Rubiano ta keda completamente eligibel pa futuro rolnan den top, y un prioridad clave bao di e cooperacion nobo ta formacion y desaroyo di gerentenan local. Gobierno tambe a reafirma su ambicion pa establece un di dos director statutario local, di acuerdo cu e guianan di LNT.
“AAA ta un activo nacional strategico”, Minister Wendrick Cicilia a declara. “Cu e partnership renoba, e proximo CEO, y e fast-track riba Gateway 2030, Aruba lo conta cu un aeropuerto dirigi profesionalmente, un continuidad operacional mas fuerte, y beneficionan a largo plaso pa nos hendenan”, Minister Cicilia a termina bisando.
