Lo tin 14 luna pa prepara ley y papia cu stakeholders --- *Lo bin tambe rebaho den otro impuestonan
ORANJESTAD (AAN): Ta importante pa haya sa kico e Landspakket ta nifica pa impuesto. Prome Minister Evelyn Wever-Croes a splica cu esnan cu a sigui e Landspakket por sa cu cada kwartaal ta traha un agenda di ehecucion.
Den e agenda di e di cuater kwartaal di e aña aki ta para cu dia 15 di November 2021 tin un fecha importante pa loke ta trata reforma di impuesto.
E mandatario a laga sa cu dia 15 di November no ta bay introduci un BTW, pero si a keda anuncia cu gobierno a tuma e decision pa bin cu reformanan den e sistema di impuesto.
E cambionan aki ta inclui un BTW cu ta bay bin cu ne entrante 1 di Januari 2023, pero alaves ta bay bin cu rebaho den otro impuestonan, Wever-Croes a laga sa.
E fecha aki ta bay duna 14 luna di tempo pa prepara pa e cambionan aki, no solamente den ley pero cu e stakeholders. Asina tur hende lo ta prepara pa januari 2023 cu e cambionan aki ta drenta na vigor.
Cu e cambionan aki ta bay move di impuesto directo pa impuesto indirecto haciendo e sistema di impuesto mas husto y mas senciyo. "Den esaki nos ta tene cuenta tambe pa nos haci e cambionan necesario den e ley di impuesto riba ganashi, winstbelasting, di e companianan pa asina haci Aruba mas competitivo, pa nos por atrae mas inversionista y pa nos inversionistanan local e peso di impuesto por baha poco", a expresa.
Minister Presidente a bisa tambe cu lo tene cuenta cu rebaha e peso di impuesto riba e ciudadanonan, specialmente e pensionadonan.
Aworaki cu e decision aki, ta bay sigui cu e consultanan cu e diferente stakeholdernan pa nan por duna nan opinion riba e diferente propuestanan. Un bes cu gobierno scucha di nan lo por bisa den ki direccion ta bay cu cada un di e cambionan cu a wordo menciona, segun Evelyn Wever - Croes.
"Cu esaki nos ta cumpli cu e landspakket. Hopi calculacion a wordo haci y mi kier gradici nos comision di reforma fiscal pa e trabao haci te awor y tin hopi trabao ainda pa haci. Pero en todo caso aworaki ta bay e parti di engagement cu stakeholders. Esey ta e parti mas interesante", e mandatario a finalisa bisando.
