ORANJESTAD (AAN): Riba Dialuna, e Asociacion di Staff di WEB, esta VWI Vereniging, a expresa e asunto di entrega 12,6% den e aña venidero como un abuso di marca mayor.
Nan ta bisa cu Gobierno di Aruba ta sigui basa su mes riba e excusa mayor cu ta Hulanda ta exigi pa corta 12.6% den salario y beneficio di tur empleado publico, semi-publico y di companianan estatal. Esaki, mientras cu CAft ta indica den su ultimo rapport cu e siguiente tranche di ayudo di likides for di Hulanda pa Aruba no ta di urgencia mas, of mas ainda, no ta necesario mas!
Segun CAft, e economia di Aruba ta recuperando rapidamente y di tal manera cu ta haci cu e ayudo di likides di Hulanda no ta echt necesario. FASE ta den su ultimo luna e november aki y loonsubsidie tambe ta stop fin di e luna aki. Cu Gobierno ta “tira piedra y sconde man” ta bisto ya cu Secretario di Estado, Sr. Raymond Knops, a bisa den palabranan cla y raspa den e debate di 6 di april 2021 den Eerste Kamer na Hulanda cu ta Gobierno di Aruba a propone na Hulanda pa pone e entrega di 12.6% aki manera condicion pa haya ayudo di likides.
Knops, claramente, no a duda ni un minuut pa acepta Gobierno Arubano su proposicion y a implementa e 12.6% entrega di salario y beneficio aki na Aruba, Curaçao y St. Maarten.
Asociacion VWI no ta di acuerdo cu e prolongacion sin motibo concreto aki di entrega di 12.6% den 2022 y ta considera e prolongacion aki un abuso di poder di parti di Gobierno di marca mayor. VWI ta keda para ariba cu e entrega di 12.6% di salario y beneficio ta un medida tuma pa Gobierno den nomber di interes general y cu esaki ta trece cu ne cu e entrega ta worde categorisa manera un onteigening di propiedad di esnan cu ta worde forsa door di Gobierno pa entrega e 12.6% di nan salario y beneficio.
Ley di Aruba ta cla y raspa riba e topico aki: si Gobierno ta onteigen propiedad di un ciudadano (bo salario ta bo propiedad) pa motibonan di “interes general” e ciudadano tin derecho pa exigi recompensacion riba loke Gobierno a kita for di e ciudadano; esaki conforme Articulo I.19 di e Staatsregeling van Aruba. Gobierno ta kitando plaka (12.6%) di empleadonan publico, semi-publico y di companianan estatal zogenaamd den interes general (ayudo di likidez) sin cu Gobierno a pasa esaki via di un Landsverordening manera exigi pa ley y sin ningun areglo con ta compensa e empleado publico, semi-publico y di compania estatal pa e entrega contra ley aki.
Na Mei 2022 ta bay haci dos aña cu VWI su miembronan ta entregando 12.6% di nan entrada mensual. Ta hopi duro pa Gobierno bin bisa cu e no a haya e tempo pa por a pasa e Landsverordening pa “onteigen” e 12.6% aki manera ley ta exigi! Esaki ta un abuso mayor y un falta di respect total pa cu nos leynan fundamental di Aruba. Miembronan di VWI ta bisa “ta basta” di e abuso aki! No mas entrega di 12.6% den 2022!
