Gobierno su plan ta pa cambia tur auto y vehiculo pa uno electrico

Pa e personal por move aden cu transporte sostenibel

• Asuntonan Economico a ricibi su prome autonan electrico
• Ministro Geoffrey Wever a indica cu tur acuerdo ta firma caba 

ORANJESTAD (AAN): Diaranson atardi, DIARIO tabata presente na Sun Plaza Mall, na momento cu oficialmente Departamento di Asuntonan Economico a ricibi nan prome 4 auto electrico pa e funcionarionan por core aden.

   Y manera cu DIARIO a trece dilanti caba e siman aki, NV Elmar a instala varios coneccion di EVChargeUp na Sun Plaza, y esaki ta cay perfectamente den e proceso pa charge autonan di bateria aki tambe.

   Durante e ceremonia teni pafo di edificio aki unda DEZHI ta ubica, por a mira presencia di Ministro Geoffrey Wever, cu representante Rachel Kraaijvanger di NV Elmar, y Michael Paesch kende ta di Green Wheels Aruba, bendedor di e autonan electrico.

   Algun luna pasa, Ministro Wever a firma un acuerdo cu NV Elmar, pa cooperacion cu e compania estatal. Bao di acuerdo aki lo instala e infrastructura necesario na departamentonan di Gobierno, cual tambe lo sirbi como sosten pa transiciona for di uzo di combustibel.  Y Ministro tin intencion pa laga tur auto y vehiculo di Gobierno bay traha cu coriente, envez di combustibel manera gasolin of diesel.  Conseho di Ministro ya a duna aprobacion caba.

   Minister Wever tabata coordina e proyecto aki hunto cu DOW y NV Elmar.  Despues di un destaho publico pa e cuatro vehiculonan electrico, a ricibi diferente ofertanan y a escohe e compania Green Wheels Aruba. E transicion aki no solamente ta mas eco-friendly, pero tambe mas economico, cual estudionan ta calcula un 14% di reduccion den costo total compara cu autonan tradicional.

    E titular di Economia a splica cu e ta orguyoso cu atrobe a dal un paso den e rumbo pa un economia mas duradero y esaki tambe den e luna di September cu ta para keto na e metanan di desaroyo sostenibel y e avansenan haci den esaki.

   E transicion pa autonan electrico, lo bira posibel danki na e colaboracion cu GO-Facility, di Union Europeo cu a pone casi 200 mil Euro disponibel pa realiza e proyecto.