Gobierno por sigui actua contra E-Steps y E-Bikes conforme procedimentonan administrativo

ORANJESTAD (AAN): Un boletin emiti pa Ministerio di Husticia, ta indica con den un recien decision di Corte relaciona cu

uzo ilegal di e-stepnan y bicicleta electrico riba camindanan publico, Corte a confirma cu Gobierno di Aruba por actua conforme procedimentonan administrativo stipula den ley.

   Na mes momento, Corte a duna claridad adicional riba e proceso administrativo cu por aplica den e caso aki.

   E caso ta relaciona cu e prohibicion di E-Steps y E-Bikes for di espacionan publico cu Minister di Husticia Arthur Dowers a anuncia algun siman atras. Den su decision, Corte a indica cu accionnan di handhaving mester tuma luga conforme e trayecto administrativo y e procesonan stipula den legislacion vigente.

   Corte a dicta cu e medidanan di control contra E-Steps y Bicicleta electrico mester tuma luga di acuerdo cu e procedimentonan administrativo prescribi den ley.

   Minister Dowers ta respeta e decision aki y lo cumpli cu e sentencia. Na mes momento, Minister di Husticia ta enfatisa cu ningun momento a tuma e vehiculonan aki den beslag sino a coy nan "in bewaring" y a entrega esakinan bek na nan respectivo doño cu a bira conoci despues di e ordemaatregel. E decision di corte no ta limita autoridad di Minister di Husticia pa actua contra e uzo ilegal of na momento cu constata infraccionnan, y lo actua conforme ley.

   Pais Aruba por, ora aplicabel, impone medidanan administrativo (manera boetnan administrativo of un orden cu sancion financiero den caso di incumplimento) y tuma accion di control contra usuarionan cu comete infraccionnan di trafico.

   Gobierno ta reafirma cu proteccion di comunidad y cumplimento di ley ta keda central den tur decision relaciona cu uzo di transporte alternativo riba caminda publico.