Premier Wever-Croes ta splica pakico varios VUT ta wordo nenga:
ORANJESTAD (AAN): Prome Minister Evelyn Wever-Croes a indica cu ora cu a drenta den gobernacion a haya retonan grandi cu gastonan di personal tabata halto. Hulanda tabata pone hopi presion riba Aruba pa baha e gastonan di personal.
Asina a bin c'un plan cu yama 'Beleidsplan verlaging personeelkosten' cual ta un maneho con pa baha e gastonan, e mandatario a splica.
Un di e temanan di maneho ta VUT. Pero si ta bin cu VUT no por reemplasa e hende. Bo laga hende bay y yena e luganan bek, bo no a baha bo gastonan di salario. E punto di VUT ta pa laga un hende bay ta pasobra no ta bay reemplas'e. Den e caso aki ta perde e vacature.
Wever-Croes ta señala cu VUT mes, gobierno n' tin ningun rol den VUT. E ley ta poni di tal forma cu no tin un rol pa minister. El a bisa cu e no sa ken ta pidi VUT, ken ta haya VUT, ken ta wordo nenga VUT. Ta ora nan ta bay bati na su porta pasobra nan a wordo nenga, el a haya sa cu nan a wordo nenga.
Tin un comision cu ta consisti director di Departamento di Finansa, director di Departamento di Recurso Humano y e hefe di departamento. Anan ta dicidi. Ora tres aña pasa cu e hendenan ta den VUT, cu nan VUT caba y cu nan ta sali for di servicio di gobierno, e ora gobierno ta haya e landsbesluit pa firma, Prome Minister a duna di conoce.
Gobierno no tin un rol activo den VUT pero e hefe di departamento si. Su conseho ta bisa hopi . Ora cu e comision reuni y ta resulta cu e hefe ta bisa cu e no por perde e vacature y cu si e persona bay e mester di un otro persona na su luga pasobra e trabao ta sigui, e ora e ta duna conseho negativo. Riba su mes Financien cu DRH no por cambie pasobra e hefe di departamento tin e bos mas pisa den esaki, a remarca.
Esey ta e motibo pakico varios VUT ta wordo nenga, a agrega.
