Prome Minister Wever-Croes:
ORANJESTAD (AAN): Relaciona cu e paro na e introduccion di un BTW, Prome Minister Evelyn Wever-Croes a duna di conoce cu e mes a reuni e ultimo biaha cu e gremionan comercial dia 18 di Juli y el a bisa cu esaki tabata un bon reunion.
E mandatario a laga sa cu na e reunion tabata tey tur representante y el a scucha hopi di e preocupacionnan cu nan a trece pa dilanti. El a expresa cu e ta reconoce cu e gremionan a duna di conoce cu aworaki pa Januari nan ta haya e tempo pa introduci un BTW demasiado cortico pa bay ahusta na tur cos.
El a agrega cu e preocupacion mas grandi ta e aspecto tecnologico riba e manera con ta adapta e sistema. Pero pa esaki no mester tin preocupacion ya cu tin profesionalnan cu por confia y ademas di esey e sector comercial ta hopi innovativo y avansa.
Un punto cu ta keda real ta e efecto inflatorio, Minister President a remarca. Ora cu a cuminsa cu e proyecto aki y cu en principio a bay di acuerdo cu ne, e situacion tabata diferente.
Wever-Croes a splica cu e situacion mundial tin su efecto riba Aruba. E efectonan inflatorio ta demasiado halto y esey ta e preocupacion cu e gremionan tambe a trece pa dilanti.
E gremionan cu cual e mandatario a combersa cu nan for di e dia ey te cu awor nan ta indica cu nan lo desea di haya un contesta di gobierno si e BTW ta sigui si of no. Pesey, e anuncio cu e introduccion di e BTW a wordo para, ta spera di por trece trankilidad.
Gobierno a keda di reuni cu e gremionan pa sigui delibera riba e topico aki y pa compronde otro ya cu tur hende tin diferente deseo y no ta haya facilmente cu por alinea tur hende cu otro, a bisa,.
Loke Gobierno ta purba di haci ta trece tur hende mas cerca di otro na bienestar di pais Aruba.
