Blackout di Dialuna
ORANJESTAD (AAN): Dialuna atardi, director Alfredo Koolman di WEB Aruba NV a duna splicacion di loke tabata mas o menos e causa cu a pone Aruba bay den dos Blackout riba un solo dia.
Tur cos ta mustra cu un fayo a socede cu un motor nobo tipo reciprocating cu Aruba a busca pa e Planta nobo di RECIP Phase 4.
E motor RECIP-4 a experiencia y fayo, y gerencia di WEB Aruba NV den linea grandi tin cierto pensamento caba con esaki a origina. Tin di corda cu e planta di awa y coriente na Balashi ta haciendo un transicion impactante y fundamental den energia di 100% Boiler pa 100% Motor di RECIP.
Aruba su experiencia cu motornan RECIP tabata basta fenomenal te ainda. Awor cu a caba di keda cla cu Planta di RECIP-4 cu ta genera 100 MW di coriente, na cierto momento tin di bay saca boilernan for di servicio. Nan ta den periodo di transicion.
“Nos personal tambe tin di custumbra cu e instalacionnan aki, y esaki ta rekeri training,” e director a splica.
El a bisa cu esaki semper na comienzo lo keda cu ‘kinderziektes’. Aunke e ta lamenta cu a haya situacion di blackout, toch ta asina cu cada incidente cu tin, ta bay investiga debidamente. Ta tuma procedimento di investigacion, pa busca tur posible origen, y e compania tin metodologia pa haci esaki. Di esey lo determina kico ta e causa. Cada incidente, lo tin di bay determina e origen pa asina tuma medida pa evita ripiticion.
