No obstante tension entre Merca y Venezuela
- Ministronan ta comunicando extenso cu Gobiernonan
- Den Haag kier trankiliza pueblo di Caribe Hulandes
ORANJESTAD (AAN): Riba Diamars, miembronan di Tweede Kamer na Hulanda a haci varios pregunta skerpi na Ministro demisionario pa Relaciones Exteriores di Hulanda, debi cu nan kier a haya sa e opinion di Gobierno ki tipo di menaza ta coriendo pa islanan ABC mirando e hecho cu tension politico y militar entre Merca y Venezuela ta escalando exponencialmente.
Ministro David van Weel a duna contesta na mayoria pregunta cu a wordo haci na dje, den e debate cu tabatin Diamars anochi den Tweede Kamer. Pero hopi aspecto di e tension, e no kier a bay mucho aden.
Ademas, Ministro no kier a ni apoya ni critica e atakenan militar Mericano riba e speedboatnan coriendo den Lama Caribe cu ta supuesto contrabando di droga.
Aunke el a bisa cu Washington ta defende e atakenan aki como asunto di ‘seguridad nacional’, pero pa Ministro van Weel e argumento ey no ta suficiente. E ta convenci cu e defensa ey lo no haya sosten den cualkier Corte di Husticia dilanti un Hues. Gobierno na Hulanda pesey ta sigui haci suplica pa e tensionnan aki de-escala, y ta pidi Merca pa atene su mes na ley internacional.
Vigilando e tension: Desde September cu Merca a cuminza ataca e supuesto botonan di contrabando di droga aki, nan a mata mas di 80 persona.
Den Haag ta siguiendo e situacion den Caribe hopi di cerca, pero nan a conclui cu hasta si acaso Merca cuminza cu un atake riba Venezuela, cu esaki lo no ta un peligro direct pa Aruba, Bonaire, ni Curaçao, y demas islanan cu ta hopi cerca cu costa di Sur America.
Toch tin bista cu kizas un atake riba e isla lo no bin di Merca, pero for di Venezuela, segun Ministro van Weel. Pero nan ta mira con regimen di Maduro ta haciendo tur cos pa evita “mas escalamento” di e tension.
Hulanda no sa kico Merca kier logra cu e accionnan riba Lama Caribe. Gobierno di Washington no a duna ningun claridad completo riba nan intencion, ni nan meta final, segun Ministro van Weel a splica.
Ningun menaza pa Caribe Hulandes: Ministro van Weel a ripiti cu e accionnan aki no ta ningun “menaza agudo pa Aruba, Curaçao y Bonaire. Nan ta mira cu regimen Venezolano “no ta dirigi riba mas escalamento”. Aki Van Weel a mustra riba e.o. e hecho cu Caracas keto bay ta sigui busca contacto cu Merca, y cu un compania petrolero Mericano ainda ta activo na Venezuela.
Ministro van Weel y Ministro Ruben Brekelmans di Defensa, a insisti cu nan tin “contacto hopi intensivo” cu islanan ABC. Contactonan di Van Weel ta cada siman, y tin biaha hasta 2x pa siman cu e gobernantenan di Aruba, Curaçao, y Bonaire. Pero no tin ningun indicacion cu un ola di refugiado lo cuminza forma debi na e accionnan aki.
Pero toch Hulanda ta preparando cierto “scenario” por si acaso e situacion toch sali fo’i man. Riba esaki tambe nan ta papiando cu gobierno di e islanan Caribense Hulandes. Ministro Brekelmans na su turno a bisa cu nan ta informando e islanan lo mihor posibel, pero nan kier evita cu pueblo di islanan ABC ta bay den panico.
Mensahe pa Caribe: Miembro di Tweede Kamer a puntra Ministro, ki mensahe e lo kier manda pa habitantenan di islanan ABC pa loke ta e momentonan di tension aki. “Hulanda ta cla pa ofrece sosten, si acaso e situacion empeora”, tabata su contesta.
Toch e miembronan di Tweede Kamer ta convenci cu e comunicacion no ta bayendo bon. Pasobra nan ta haya cu gobierno di Hulanda den ultimo lunanan tabata demasiado silencioso pa cu e situacion, tanto den informacion na islanan ABC y tambe den informacion duna na Tweede Kamer. E Ministronan a acepta esey, y awor ta indica cu mihor nan tabata mas proactivo na comienso den comunicacion.
Ministronan a splica cu e momento aki den Lama Caribe nan tin algun barco moviendo, incluyendo e barco di suministro Zr.Ms. Den Helder cu ta uno nobo y cu “pa casualidad ta den Caribe”, y pesey a dicidi na lage keda aki mas.
Hulanda tin Plan-B: Ministronan a splica den e debate na Hulanda, cu por si acaso den un escenario extremo si acaso atrobe islanan ABC keda sin ricibi turismo, of si acaso diripiente no tin cargamento di container cu cuminda ta yega na e islanan aki, nan lo por haci uzo di e barco aki cu si lo por pasa den cualkier teritorio maritimo pa trece suministro di cuminda of otro material pa e islanan. Ademas di esey, Ministro a menciona otro barconan, e.o. Pelikaan cu ta di Defensa Hulandes tambe pa sostene Wardacosta di Caribe Hulandes.
Pero Ministro a enfatiza claramente cu Hulanda no kier aumenta nan presencia militar den Caribe. Esaki ta pa evita cu nan lo por bay participa den un conflicto cu lo por presenta su mes. Hulanda pesey a informa Washington cu nan lo no forma parti den ningun operacion militar contra Venezuela.
No ta uza aeropuerto di ABC: Ta asina cu den cuadro di FOL di Merca, nan ta haci uzo di Aeropuerto di Curaçao y Bonaire pa operacion den cuadro di combatimento di droga, y ta haci uzo ey di avionnan cu no tin arma abordo.
Te cu awor, Hulanda por confirma cu ningun Aeropuerto di Curaçao ni di Bonaire no a wordo uza den atakenan cu misil riba e botonan den Caribe. Ministro Brekelmans no kier a duna contesta si acaso ta compartiendo inteligencia cu Merca pa cu transporte dio droga.
