Un decision sumamente asombroso
- Nan ta keda cu mesun salario y hasta mihor beneficio
- Mas dia di vakantie tambe pa cada uno
ORANJESTAD (AAN): Un noticia grandi ta loke gerencia di Renaissance Wind Creek Aruba Resort a divulga e siman aki, durante un conferencia di prensa convoca den Renaissance Marina Hotel Boardroom na Playa.
Riba di 1.100 trahador laborando pa Wind Creek Aruba, cu ta consisti di Renaissance Marina Hotel y Renaissance Ocean Resort, tambe The Mall, y Marketplace Mall, hunto cu personal di Crystal Casino y tambe Seaport Casino, y negoshinan di tres sucursal di Starbucks, y tambe Five O’Clock Somewhere Bar & Chill, lo bay beneficia di algo grandi.
Barbara Bronswinkel kende ta director di Recurso Humano a divulga cu entrante comienso di 2026, tur nan trahador lo bay cay bao di un schedule di trabao, cu ta di 5 dia pa siman.
Mayoria di e trahadornan di Wind Creek Aruba ta laborando seis dia pa siman, y esaki awo lo bay conoce un cambio grandi. E ta un reto cu e compania a tuma, pasobra e lo bay ta trece logistica operacional grandi, y tambe lo nifica hopi den nan impacto financiero.
Bronswinkel a recalca cu entrante 1 Januari 2026, e maneho nobo ta cu tur empleado lo bay labora awor pa 40 ora pa siman. Empleadonan lo keda cu nan salario basico, y ta bay re-evalua tur adicional beneficio pa haci e salario mas atractivo. Awor empleadonan lo bay haya 2 dia liber pa siman, y lo aumenta nan cantidad di dia di vakantie tambe. Pues hopi di nan lo cambia di 16 dia pa aña, pa awor 19 dia di vakantie anual.
Algo acerca cu Wind Creek Aruba ta haci pa nan empleadonan balioso, ta cu cada aña e cantidad di dia di vakantie lo sigui subi, te na maximo di 23 dia di vakantie anual.
No ta futuro mama so ta haya ‘Zwangerschap Verlof’, pero awor e tata tambe. Enbes di haya djis 2 dia liber, di awor en adelante na 2026, futuro tatanan na Wind Creek Aruba lo bay ricibi 2 siman liber pa asina yuda e mama cu tur asunto ora cu un baby a nace.
Esnan interesa den empleo di Wind Creek Aruba, a ser splica cu nan tin como 90 cupo habri den diferente area, manera Casino, Security, F&B, Housekeeping, y mas. Nan tin tur esaki riba pagina di Facebook Careers di Wind Creek Aruba.
