Gobierno di Aruba ta prepara pa brinda asistencia despues di temblor na Colombia

Mirando cu tin hopi Arubiano di vakantie aya

ORANJESTAD (AAN): Gobierno di Aruba ta sigui monitoria de cerca e situacion despues di e fuerte temblor cu a afecta diferente region di Colombia riba Dialuna mainta. E imagennan cu ta circula ta mustra e impacto considerabel di e evento natural, loke naturalmente a lanta preocupacion entre famianan di Aruba cu tin sernan stima actualmente na Colombia.

   Durante conferencia di prensa, Gobierno a confirma cu Centro di Maneho di Crisis (CMO), hunto cu e instancianan concerni, ta trahando pa forma un inventario lo mas completo posibel di ciudadano Arubiano cu actualmente ta na Colombia. Segun e informacion preliminar, diferente ciudadano ta na e pais pa motibonan manera tratamento medico, estudio, bishita familiar y vacacion.

   Gobierno ta haci un suplica na tur ciudadano di Nacionalidad Hulandes cu actualmente ta na Colombia pa mantene contacto cu e autoridadnan consular, pa asina brinda asistencia via Consulado y registra nan estadia, pa asina por facilita un contesta rapido den caso cu asistencia mester.

   Pa asistencia consular, ciudadanonan por tuma contacto cu:  “Embahada di Reino Hulandes na Bogota”, telefon (+57) 601-638-4200.  Tambe tin liña di WhatsApp (24 ora): (+31) 857-737-400.

   Ciudadanonan cu ta den e region di Cali tambe por tuma contacto cu e Consul Honorario di Reino Hulandes na Cali, esta (+57) 2666-1663 y na email: This email address is being protected from spambots. You need JavaScript enabled to view it.

   Gobierno di Aruba ta sigui monitoria e desaroyonan den coordinacion cu e autoridadnan competente y ta reafirma su compromiso pa brinda e asistencia necesario na tur ciudadano Arubiano cu eventualmente lo por bay tin mester apoyo.