Gobierno di Aruba ta felicita Manchebo Hotel pa nan di 55 aniversario

ORANJESTAD(AAN): Management di Manchebo Hotel a invita Prome Minister Evelyn Wever-Croes pa forma parti di nan celebracion di 55 aña di aniversario.

Ademas a corta sinta como muestra di apertura di e tienda Red Sail Sport cu ta situa na Manchebo. Prome Minister a hiba palabra na e ocasion y a felicita e compania y tur empleado cu a haci esaki posibel.

Manchebo Hotel ta un hoya Arubiano, pa cual ta sumamente orguyoso pa su nivel reconoci mundialmente. Manchebo su exito ta e exito di Aruba tambe, pesey ta aprecia e balor, trabou duro y logronan di e hotel, dunando danki inmenso pa tur contribucion na nos comunidad den transcurso di añanan y tambe pa e dedicacion desplega pa sigui eleva e standard/nivel di servicio di Aruba.

55 aña no ta un logro chikito. Pa un compania ta exitoso esaki ta posibel a traves di esnan cu ta traha dia y anochi y compromete nan mes na brinda e mihor experiencia posibel pa tur bishitante.’

Na un ocasion manera esaki cu ta celebra e di 55  aniversario, e ta un momento tambe pa refleha riba e añanan cu a transcuri y locual a haci e compania exitoso, manera confiansa y durabilidad.

Sostenibilidad tin di haber cu sobrevivencia, sinembargo resiliencia ta e habilidad pa supera e sucesonan inespera. E meta di ta sostenibel ta pa prospera, cual Manchebo sigur a sa di haci specialmente durante e ultimo 2 añanan. Segun cu Aruba ta riba e rumbo pa forma un comunidad mas resiliente, Manchebo sigur ta un ehempel, Premier Wever - Croes a expresa. 

APERTURA DI TIENDA

Red Sail Sports tambe ta celebra un logro, un tienda unico aki na Aruba y cu ta situa na Manchebo. Pa cual Premier ta gradici tur esnan encarga pa habri e boutique aki y pa kere den Aruba den tempo bon y menos bon. Ta balora cada persona cu ta kere den Aruba y ta haci inversion den un tempo manera cu nos ta aden actualmente.

Pa conclui, Prome Minister den nomber di Gobierno di Aruba a felicita y desea exito na esnan di Red Sail Sports y henter e famia, management, empleadonan y colaboradornan di Manchebo cu e bon trabou y dedicacion na e exito di Manchebo y pa impacto positivo cu tin riba e industria turistico di Aruba.