Gobierno di Aruba ta completa fondo pa Lago Heights Park

Minister Gerlien Croes:

• E lo wordo ehecuta di Maart pa Mei 2026 

ORANJESTAD (AAN): E siman aki, CEDE Aruba ta contento di anuncia cu Gobierno di Aruba, bou liderazgo di Minister di Educacion y Deporte, mr. Gerlien Croes, a aproba 170.000 Florin adicional pa desaroyo di Lago Heights Park. Cu e decision aki, a sigura e presupuesto total pa e proyecto.

   E realisacion di Lago Heights Park ta posibel pa medio di un colaboracion fuerte entre partnernan local y internacional. Financiamento pa e proyecto a wordo sigura pa medio di contribucion di CEDE Aruba (co-financiador y coordinador), Stichting Jantje Beton (Hulanda), Ministerio di Interior y Relacionnan den Reino (BZK) via Representatie van Hulanda na Aruba, Curaçao en St. Maarten (VNACS), y Gobierno di Aruba. Hunto, e partnernan aki a percura pa e cobertura financiero completo di e proyecto y a demostra un compromiso comparti pa inverti den espacionan publico sigur, inclusivo, y di calidad halto pa mucha y comunidadnan na Aruba.

   E aprobacion ta permiti e proyecto pa sigui den su fase final di implementacion. Actividadnan di construccion y instalacion ta programa pa e periodo di maart pa mei 2026, den colaboracion estrecho cu contratistanan local, autoridadnan publico y partnernan di e proyecto. Trabaonan preparatorio y elementonan clave a wordo adkiri y a tuma luga caba.

   Den preparacion pa implementacion, CEDE Aruba lo organiza un reunion di stakeholders publico riba diaranson 25 di februari 2026 na YMCA San Nicolas. E reunion aki lo trece hunto residentenan, scolnan, organizacionnan den comunidad, y otro stakeholders cu a contribui na e proceso di co-creaccion. Participantenan lo wordo invita pa wak e diseño final, ricibi un actualisacion riba e planificacion di implementacion y explora oportunidadnan pa colaboracion riba actividadnan pa comunidad, eventonan y  mantencion a largo plaso di e parke.

   Lago Heights Park ta wordo visualisa como un espacio publico comparti cu ta sostene e desaroyo di muchanan, fortalece e bida den comunidad y ta stimula e uzo activo door di famianan y scolnan. CEDE ARUBA ta mira padilanti riba un cooperacion continuo cu Gobierno di Aruba, partnernan di proyecto y comunidad di San Nicolas pa garantisa realisacion exitoso y uzo sostenibel di e parke.