Gobierno di Aruba a reuni cu Embahador di Filipinas pa Reino Hulandes

ORANJESTAD (AAN): Diaranson, Prome Minister di Aruba, mr. Mike Eman,

a tene un reunion importante cu Embahador di Filipinas pa Reino Hulandes, sr. Jose Eduardo Malaya III, hunto cu Consul di Filipinas pa Aruba, sra. Amy Henriquez-Mendez y Vice Consul di Filipinas na Hulanda Crystal Gale Dampil.

            Ademas Minister di Salubridad Publico drs. Mervin Wyatt-Ras, tambe a reuni cu Embahador Malaya y su delegacion y a hiba un combersacion ameno den cual a enfoca riba e impacto di e colonia Filipino riba Aruba.

            Embahador Malaya a inicia su carera diplomatico na Hulanda dia 7 di april 2021, despues cu el a presenta su carta di acreditacion na Su Excelencia Rey Willem Alexander. Prome cu esey, Embahador Malaya a sirbi como Deputy Minister of Foreign Affairs di Filipinas y tambe como Director-General for Treaties and Legal Affairs. Entre 2011 y 2017, el a ocupa e puesto di Embahador di Filipinas na Malaysia.

            Na 2010, Embahador Malaya a ricibi e rango di Datu (Distincion di Oro) den Orden di Sikatuna for di Presidente Gloria Arroyo, y e rango di Dakilang Kamanong (Grand Cross) den Orden di Mabini (Gawad Mabini) na 2016 for di Presidente Benigno Aquino III.
Na 1995, Embahador Malaya a ricibi dos Rekonocemento Presidencial, un for di Presidente Fidel V. Ramos y un otro for di Presidente Arroyo na 2010.

            Vice-Consul Crystal Gale Dampil desde april 2025 ta “Third Secretary and Vice Consul” na Embahada di Filipinas na Den Haag. Prome cu esaki, Vice Consul Dampil tabata den mesun funcion pero estableci na China y entre 2018 y 2021 a ocupa e puesto di Legal Officer y despues Principal Assistant na e oficina di Treaties and Legal Affairs di Gobierno di Filipinas.

            Durante di e reunion, nan a pone enfasis riba e laso fuerte y duradero cu ta existi entre Aruba y Filipinas ya pa hopi aña. Tambe a papia riba e comunidad Filipino estableci na Aruba, cu ta conta cu mas o menos 5000 persona, y cu ta forma un parti vital den e desaroyo social y economico di nos pais. E comunidad Filipino na Aruba tin un rol vital den e sector di cuido y hospitalidad, cual tanto Prome Minister como Minister di Salubridad Publico a comparti durante e encuentro cu e Embahador.

            E reunionnan a sirbi como un paso firme pa sigui fortifica e relacion bilateral pero tambe e relacion dimplomatico entre Aruba y Filipinas. Na final di e encuentro, a tuma luga un intercambio di regalo tipico di cada Pais.