Minister di Cultura:
ORANJESTAD (AAN): Siman pasa Minister Maduro di Cultura tabata presente na Cas di Cultura pa e anuncio importante di e “E Brasa” cu ta nomber di e proyecto di renobacion di Cas di Cultura.
Un proyecto balora na 17 miyon florin pa cual Gobierno di Aruba a reserva 4 miyon florin pa conserva e monumento special aki, cu ta un tarima cultural importante pa Aruba pa mas di 65 aña brindando espacio pa diferente forma di expresion di arte y cultura na nos Pais.
Aparte di e renobacion di e parti monumental di Cas di Cultura, den cual lo drecha e escenario y ekipa esaki cu e tecnica moderno necesario, luznan adecua y sientanan confortabel, e edificio lo wordo amplia cu un brasa cada banda pa asina extende e espacio y amplia e posibilidadnan pa arte y cultura por wordo expresa y admira optimalmente.
Minister Maduro di Cultura ta satisfecho di por a logra pa Gobierno di Aruba pone 4 miyon florin disponibel pa asina e proyecto di renobacion aki, cu ta un soño y esfuerso di e ekipo di Cas di Culturq desde aña 2017, porfin por ranca sali y bira un realidad.
E mandatario ta haci un yamada tambe na tur instancia y persona cu ta stima Aruba su cultura, pa brasa e proyecto importante aki cu un aporte financiero, pa asina sigura cu Cas di Cultura por yega na e fondonan necesario pa e renobacion.
Minister Maduro ta gradici y felicita e ekipo di Cas di Cultura cu e bunita proyecto aki y ta spera cu mas instancia y persona pronto tambe por aporta pa asina nos tur por sigura cu Cas di Cultura por sigui ta nos centro cultural pa por lo menos 30 aña mas.
