Lo brinda 500 Florin tur luna
- Meta pa implementacion na Januari 2027
- 500 Florin ta djis e prome paso
ORANJESTAD (AAN): Prome Minister Mike Eman, hunto cu Minister di Asuntonan Social, drs. Mervin Wyatt-Ras, a presenta dialuna mainta un proposicion di ley cu tin como meta introduci un sosten financiero mensual di 500 Florin pa cada mucha cu discapacidad fisico of mental, desde nan prome añanan di bida te 18 aña, conforme e criterianan estableci.
Durante e entrega, Prome Minister Eman a califica e iniciativa como un momento importante pa hopi famia na Aruba cu durante basta tempo ta enfrenta retonan adicional den cuido y desaroyo di nan yiunan.
Segun Eman, actualmente Aruba tin un areglo di sosten financiero pa personanan cu discapacidad cuminsando for di 16 aña, pero ainda tin un necesidad pa brinda sosten na famianan cu yiunan mas chikito cu ta enfrenta limitacionnan fisico, mental of otro reto di desaroyo.
Cu e proposicion nobo, Gobierno ta busca atende e necesidad aki y fortalece e red di proteccion social pa un grupo cu frecuentemente ta enfrenta gastonan y responsabilidadnan adicional.
Un sosten cu ta reconoce e realidad di famianan: Prome Minister Eman a enfatisa cu cria un mucha cu discapacidad por trece retonan financiero y practico significativo pa un famia. Gastonan relaciona cu terapia, ekipo special, adaptacion di vivienda, educacion y otro necesidadnan por representa un carga considerabel.
E contribucion mensual di Afl. 500 ta busca alivia parti di e gastonan aki y brinda mayornan mas espacio financiero pa atende e necesidadnan di nan yiunan.
Un aspecto importante di e proposicion ta cu e sosten lo ta brinda na cada mucha cu ta cumpli cu e condicionnan. Esaki ta nifica cu un famia cu tin mas cu un yiu elegibel por bin na remarca pa e contribucion pa cada un di nan.
Ademas, e proposicion no ta haci distincion entre mayornan cu ta ricibi bijstand y esnan cu tin un salario fiho. E intencion ta pa necesidad di e mucha y e criterianan legal determina elegibilidad, sin exclui automaticamente un famia pa motibo di su entrada.
Parti di un esfuerso mas amplio pa fortalece proteccion social: Den su declaracion, Prome Minister Eman a pone e iniciativa den e contexto di diferente medida social cu Gobierno ta impulsando pa fortalece sosten na gruponan cu ta enfrenta mas vulnerabilidad financiero.
El a haci referencia na medidanan relaciona cu pensionadonan, asistencia social, sosten pa muchanan y e aumento di salario minimo, como parti di un enfoke mas amplio pa mehora condicionnan di bida den comunidad.
Segun Eman, e proposicion pa yiunan cu discapacidad ta cay den e mesun pensamento: reconoce cu diferente grupo den sociedad tin necesidadnan particular y cu e sistema di proteccion social mester tene cuenta cu esakinan.
Eman a destaca e colaboracion cu Minister Mervin Wyatt-Ras den e preparacion di e iniciativa, cu ta busca traduci e necesidad identifica den un areglo legal concreto.
500 Florin como un prome paso: Actualmente ainda no tin un cifra definitivo di cuanto mucha na Aruba lo bin na remarca pa e contribucion mensual.
Prome Minister Eman a indica cu e propuesta di Afl. 500 ta representa un bon punto di salida, mientras cu Gobierno lo evalua e cantidad di beneficiario y e impacto financiero di e areglo.
Dependiendo di e resultadonan y e posibilidadnan presupuestario, un eventual aumento di e contribucion por wordo considera den un fase posterior.
Pa determina elegibilidad, Gobierno a instala un comision cu lo defini e condicionnan y criterianan medico cu lo cay bao di e areglo. E evaluacion lo tene cuenta diferente tipo di discapacidad y condicionnan cu ta genera necesidad di sosten adicional.
Meta pa implementacion na januari 2027
Cu entrega di e proposicion di ley, e siguiente paso ta su tratamento y eventual aprobacion door di Parlamento di Aruba.
Gobierno tin como meta pa e proceso legislativo por conclui prome cu fin di 2026, di manera cu e sosten mensual, si wordo aproba y e preparacionnan necesario ta completa, por drenta na vigor dia 1 di januari 2027.
Prome Minister Eman a expresa su satisfaccion cu e iniciativa, cu segun Eman ta responde na un necesidad real cu hopi famia na Aruba ta enfrenta diariamente.
E proposicion ta busca no solamente alivia un carga financiero, sino tambe reconoce e dedicacion y esfuerso di mayornan cu ta brinda cuido adicional na nan yiunan.
Cu e medida aki, Gobierno ta busca fortalece e red di proteccion social di Aruba y duna famianan cu yiunan cu discapacidad un sosten concreto pa contribui na nan bienestar y calidad di bida.
