"Gobierno a pone tur hende entrega riba solidaridad y awor ta cambie"

Josephine Albertus di SIMAR --- ORANJESTAD (AAN):  Manera a wordo anuncia, varios sindicato di trahadornan a keda di bay tene nan manifestacion dialuna mainta.

Varios di nan a yama nan miembronan pa asina reuni rond di e tema di 12,6% di recorte di salario.

Un di e sindicatonan aki tabata e Sindicato di Maestronan (SIMAR) cual a yama un reunion extraordinario. Josephine Albertus, presidente di SIMAR a indica cu pa nan por duna informacion riba kico ta pasando pa loke ta e recortenan no solamente riba e trahadornan den enseñansa, pero tambe riba e cartera di enseñansa en total cu tambe tin recorte.

El a bisa cu nan ta haya cu esey no por. E ta algo preocupante pa nan y tambe pa wak cu gobierno a pone tur hende entrega riba solidaridad y awor ta cambie. Kiermen 20 luna largo bo a entrega keriendo algo cu no tabata asina. Nos ta haya esey un berguensa y di bon curason pa 20 luna largo hende a entrega y nan a yuda tur esnan cu a perde trabao cu tabata tin mester di ayudo, awor esey ta caba y nos ta bisa cu nos por sigui asina aki",

Albertus ta alega cu no tin transparencia. Nan no sa unda e placa ta bay, cuanto e ta. Tin cu djis keda entrega, pero cada biaha ta haya un otro motibo p'e y esey no por, a bisa.

Finalmente e sindicalista a expresa cu e reunion tabata pa duna e informacion manera cu e ta y pa momento cu nos tuma e siguiente stap, sa cu tur hende ta bon informa.