Gobierno a haya sa kico e ‘costonan berdadero’ ta pa cuido di adulto mayor

Pa temporada 2025 te cu 2040

 *Hopi reclamo cu algun adulto mayor no ta haya suficiente cuminda

* Pone atencion pa organizacionnan di cuido funciona optimalmente 

ORANJESTAD (AAN): Siman pasa, Directie Ouderenzaken tabatin un cita cu Ministronan, pa asina a duna un presentacion audiovisual riba un aspecto importante pa con Gobierno tin di atende asunto di Adultonan Mayor na Aruba.  E biaha aki, e topico a enfoca riba e “Costonan berdadero” di cuido pa adulto mayor.

   Entre otro a sali na cla cu na Aruba tin diferente categoria di cuido, y tanto Ministro Ursell Arends como tambe Ministro Presidente Evelyn Wever-Croes a haya splicacion na placa chikito, ta kico esaki tur ta encera.

   Claro a presenta informacion tambe, di con mester inverti y pone atencion ariba pa organisacionnan di cuido por funciona debidamente. Esaki usando e bedrijfvoeringsmodel di AAG, cual ta centralisa hende, proceso y sistemanan cu por mehora e cuido pa nos adultonan mayor.

   Tur esaki ta algo cu Gobiernonan na Aruba tin di bay tene hopi cuenta cune.  Y tambe scucha por fabor reclamo di ciudadanonan eyfo, cu tin un Adulto Mayor cu ta kedando na un Centro pa Anciano riba e isla.  Ultimo tempo por a tende basta reclamo cu aunke nan ta pagando un suma mensual pa cuida nan ser stima di edad grandi, e reclamo cu nan ta haya hopi biaha ta cu e ancianonan no ta haya ‘suficiente cuminda’ pa come.  Famianan mes ta haya nan cada biaha ta trece extra cuminda pa nan ser stima come apart den su camber.

   E reclamo aki a bin ta saliendo mas y mas riba superficie, y e ta un preocupacion awor tambe pa siguiente Gobierno atende cune.

   Kizas nos adultonan mayor no ta costumbra di come cuminda cu dietistanan ta presenta pa nan, e.o. cuminda cu proteina “mas liviano”, manera pisca, galiña, webo, y hasta tofu.  Pasobra si bo laga nan come e cuminda perfecto, e lo por yuda esnan di edad grandi keda mas saludabel y activo.  Tambe fruta cu berdura, grando completo, proteina di poco vet, y tambe productonan di lechi di poco vet, tur esey ta componentenan esencial pa un dieta saludabel pa nos grandinan.

   Excepto cu hopi biaha nos grandinan no a costumbra come esakinan, y ora nan haya esaki riba nan tayo pa come na e Casnan di Anciano, nan ta sinti cu e “cuminda no ta suficiente”, y ta cuminza keha cerca nan famia.  Tin caso unda famia a haya nan ta muda nan ser keri for di un Cas di Anciano, y mande pa un otro.  Na e otro si, e adulto di edad grandi a keda satisfecho cu e cuminda cu ta wordo sirbi eynan.  Pues toch ta algo pa inclui den un estudio na Aruba pa haya sa con satisfecho clientenan ta cu e cuminda.