Gobierno a firma MOU hunto cu AZV y BRA den cuadro di lista di espera pa cu salud mental

ORANJESTAD (AAN): Diahuebs mainta, Minister di Husticia y Asuntonan Social Sr. Rocco Tjon tabata presente ora cu

director di AZV Sr. Edwin Jacobs y director di Bureau Rampenbestrijding Aruba (BRA) Sr. Rino Hermans a firma e convenio pa asina trabaonan pa atende cu e lista di espera pa cu salud mental por inicia. AZV a pone e fondonan disponibel y BRA lo percura pa e administracion. Di e forma aki ta emplea e profesionalnan necesario manera psicologonan pa bay atende cu e lista di espera. Un momento hopi importante, mirando cu hopi biaha a toca e tema di e problematica di e lista di espera, ora ta papia di salud mental.

   Durante e momento aki a conta cu presencia di profesionalnan di Respaldo, Directie Volks Gezondheid (DVG), profesionalnan di Ministerio di Husticia y Asuntonan Social, FMAA y SPD. Banda di esaki, HAVA tambe, apesar di no por tabata presente, ta un stakeholder clave, cual a firma diferente protocolnan for di aña pasa, pa asina garantisa pa por atende entre otro cu e aspectonan aki. Un analisis a worde haci pa determina con largo e lista di espera berdaderamente ta. A base di e analisis aki a determina e cantidad como tambe e tipo di profesional cu lo mester worde emplea, pa asina por atende cu e tema aki den un tempo defini.

   Segun e mandatario, bo por inverti den infrastructura y den e parti di material cual ta necesario pa e profesionalnan por haci nan trabao, pero na final di dia e ta keda "mensenwerk”. Dentro di un tempo, Aruba lo por mira e balor agrega di e proyecto aki, ora cu finalmente, lo logra acumula suficiente data, pa asina atende cu e parti aki na un manera eficiente y eficaz pa loke ta recursonan. E cooperacion entre ministerionan, diferente departamentonan, como tambe stakeholders, lo bay percura pa e tema di  salud mental por haya su debido atencion den un manera mas transparente y mucho mas miho.

   E luna aki tin otro trabaonan tambe riba e tereno di Salud Mental cu lo inica. Manera ta conoci, Stichting Hunto lo tin su groundbreaking e luna aki, pues e proyecto infrastructural lo inicia, caminda FMAA y SPD lo uni como un solo stichting. Banda di esaki, como parti di e vision a largo plaso, lo instala algun “werkgroepen” pa atende cu e partinan legislativo, e parti di enseñansa, workshops pa tur e profesionalnan cu ta traha den e veld, como tambe e parti di finanzas.

   Por ultimo, e mandatario a duna un danki na AZV y BRA pero tambe ministerio di Salubridad Publico y Minister President Señora Evelyn Wever-Croes pa a aporta na e parti aki pa por sobrepasa e reto cu nos ta worde confronta cune.