Gobierno a firma MoU cu Xavier University pa eleva calidad di cuido di e Adultonan Mayor

ORANJESTAD (AAN):  Durante ultimo lunanan Minister Arends a bin ta tene diferente reunion cu Xavier University ariba e topico di adulto mayor.

Un di e desaroyonan cu a sali di e combersacionnan aki ta cu dialuna Gobierno di Aruba ta firma un MoU (Memorandum of Understanding) hunto cu Xavier University unda ta compromete pa hunto haci avanse den educacion, innovacion y estudionan pa loke ta trata cuido pa nos adultonan mayor.

            E colaboracion lo encera cu Xavier University lo ofrece programa di certificacion pa esnan cu ta provee cuido pa adulto mayor pa asina eleva e calidad di esaki den casnan di cuido. Un inicio pa haci un impacto berdadero y cumpli cu nos adultonan mayor.

            Ministerio di Asuntonan di Adulto Mayor ta abordando e desafionan cu adultonan mayor ta enfrenta y ta sigui enfoka riba solucion. Durante Foro Nacional 2023 a ricibi aporte di tur stakeholders pa por a yega na un convenio, un compromiso pa finalmente cuminsa na traha hunto pa asegura e bienestar di adulto mayor.

            Na maart lo tuma luga e Foro Nacional 2024 unda e comite 'Foro Adulto Mayor' lo presenta nan consehonan cu stapnan concreto cual ta inclui aporte di varios stakeholders. "Tur hende riba e mesun liña, cu e mesun meta, creando un futuro unda nos adultonan mayor por disfruta di nan embehecimento cu e sosten, compasion, y avansenan di un comunidad cu ta balora nan," segun Minister Ursell Arends.

            Palabra di gradicimento na Xavier University pa reconoce e importancia den cuido di adulto mayor y ta premira un colaboracion fructifero.