ORANJESTAD (AAN): Durante dianan 3 y 4 di augustus 2026, na Directie Volksgezondheid Aruba, DVG,
a tuma lugar dos sesion di trabou cu participacion di diferente stakeholder den cadena di cuido y husticia na Aruba. Entre otro, representante di Respaldo, Stichting Hunto, Veiligheidshuis Aruba, Ministerio Publico, Reclassering y Stichting Brasami di Corsou a participa na e sesionnan.
Meta di e sesionnan tabata pa fortalece colaboracion entre e diferente instancianan y traha riba contenido y proceduranan relaciona cu un convenio entre Pais Aruba y Stichting Brasami, unda cuido obligatorio bou instruccion di Juez por ta realisabel. Esaki pasobra na Aruba no tin e structura disponibel pa brinda e cuido obligatorio pa adiccion intra mural aki.
Diaranson 5 di augustus 2026, Minister di Salud Publico, Asunto Social, Cuido di Adulto Mayor y Maneho di Adiccion, drs. Mervin Wyatt-Ras, a firma e convenio. Cu firma di e convenio, Gobierno di Aruba lo por haci uso di servicio di Brasami pa un grupo specifico di personanan cu adiccion cu ta of wordo buta bou curatela di Juez.
Ta importante pa infatisa cu e programa aki no ta destina pa cualkier persona cu un problema di adiccion. E programa ta explicito pa trata personanan cu ta of ta wordo buta bou curatela di Juez unda un trajecto specialisa y intensivo ta necesario. Pa cu e proseso aki tin un comision di indicacion pa cuido largo den exterior cu ta fungi como consehero den ful e trajecto.
E programa na Brasami lo tin un duracion di seis luna y ta consisti di diferente fase:
1. Detoxificacion
2. Creacion di structura y estabilidad
3. Tratamento intensivo
4. Resocialisacion y reintegracion den comunidad.
E fase nr 4 di resocialisacion y reintegracion lo continua na Aruba, cu acompañamento y sosten di e diferente partnernan local. Esaki ta esencial pa yuda e persona aplica loke ela siña durante su tratamento, reconstrui su bida y reintegra gradualmente den famia y comunidad.
Durante e sesionnan, Brasami a comparti conocemento basico tocante adiccion, e problemanan cu por ta na raiz di adiccion y su vision riba tratamento. Tambe a trata e criterianan pa admision, e documentacion necesario, e procedura di registracion y responsabilidad di cada instancia den e trajecto.
Cu e cooperacion aki, Aruba ta traha na un cadena di cuido mas structura y conecta, unda tratamento na Corsou y acompañamento na Aruba ta forma parti di un solo trajecto. E meta final ta pa ofrece e grupo vulnerabel aki un oportunidad realistico pa recuperacion, estabilidad y un reintegracion sostenibel den comunidad.
