Gobierno a cende lusnan di Pasco na Bestuurskantoor

ORANJESTAD (AAN): Den fin di siman, Gabinete AVP-Futuro a reuni na centro di gobernacion pa duna inicio simbolico

na e temporada di mas dushi di e aña: e temporada festivo di Pasco y fin di aña.

   Pa drenta den e espirito navideño, durante e ultimo simannan, a decora Bestuurskantoor cu artefactonan y lusnan tipico pa e epoca, creando un ambiente di alegria y union.

   Pa 7 or di anochi, Prome Minister mr. Mike Eman, acompaña pa Minister mr. Wendrick Cicilia a cende e lusnan di Bestuurskantoor. E acto simbolico aki ta representa e inicio di un temporada di speranza, gratitud y amor pa prohimo. Unico tabata e presencia tambe di un mucha turista William Bergen Barlow for di Ontario, Canada cu fundacion Make-A-Wish Foundation a haci  posibel pa trece Aruba pa prome biaha.

   E cendemento di e lusnan ta un recordatorio pa sigui comparti bondad, union y compasion entre nos mes y cu nos comunidad. Cada lus cu ta briya, ta simbolisa e speranza cu nos tin pa un futuro miho pa nos pais y pa tur hende cu ta forma parti di e gran famia Arubiano.

   Gobierno di Aruba ta desea tur ciudadano un temporada di paz, amor y prosperidad, y ta invita pueblo pa celebra e dianan di fin di aña den union y respet.