Gobierno a actua pa sigura sobrevivencia di e ciudadano

Minister Glenbert Croes riba rapport di ARA:

ORANJESTAD (AAN): Diahuebs atardi durante un conferencia di prensa, minister Glenbert Croes a reacciona riba un rapport di Algemene Rekenkamer (ARA), relaciona cu FASE, cual Croes tabata encarga cune.

E rapport tabata tin 5 conclusion parcial:

- Ayudo financiero FASE a wordo brinda di forma generoso y accesible

- No tin suficiente garantia cu tur caso a wordo evalua igual

- Infraccion riba e siguranza huridico di e ciudadano

- Uso di FASE di forma economico no ta suficientemente garantiza

- Falta di mehoracionnan structural di proceso

E mandatario a cuminza na bisa cu FASE a wordo institui pa yuda trahadornan cu a perde salario of nan trabao y tambe ta yuda ZZP’ers.

“Apesar cu mi ta kere cu un gran trabao sobre humano a wordo haci, obviamente nos como Gobierno ta tuma e rapport, e recomendacion y criticanan di Algemene Rekenkamer na Serio”, segun e minister.

Pa loke ta e parti unda cu ta wordo bisa cu FASE a wordo duna na un manera generoso y accesible Croes a bisa cu e no ta haya esey algo negativo.

El a bisa tambe cu pa loke ta e parti unda cu ta wordo menciona cu no tur caso a wordo evalua na un manera igual, e no ta di acuerdo.

“Una vez cu FASE a cuminza despues cu e prome casonan a wordo reporta,  pami e sensacion di e momento tabata como si fuera mundo tabata bay caba”.

Tabata un sensacion di gravedad y preocupacion.

Mester corda cu no tabata tin un manual riba e tipo di situacionnan aki y e siguiente siman mesora nos a reuni cu e stakeholders y nos a traha un taskforce di FASE cu tabata consisti di diferente instancia y departamento, pa nos bay institui e forma di Asistencia Social di Emergencia aki atravez di FASE, segun e mandatario.

El a sigui bisa cu Gobierno a aproba FASE y mester a actua lihe, sin cu tabata tin no solamente un manual sino tampoco un ley, pasobra nada cu tabata pasando e momentonan ey, hende por a imagina cu por a pasa.

Croes a indica cu segun cu e lunanan tabata bayendo, tabata tin cambionan chikito manera por ehempel e hecho cu inicialmente pensionadonan cu tabata trahando no tabata haya FASE.

“Den transcurso di lunanan nos a haya e conseho legal di nos instancianan cu a bisa nos pa haci cambio pa yuda”.

Quizas na comienzo no tabata tin un ley, pero e motibo dicon nos a bin cu FASE tabata pa yuda famianan y ciudadanonan sobrevivi quizas e calamidad di mas grandi cu por a existi den nos historia.

Ainda no tin un ley, pero djis imaginabo si nos mester a warda pa e ley keda completamente cla, pa e ora ey yuda hende, segun e minister.

  Croes a reacciona tambe riba e parti di e rapport cu ta bisa cu via FASE a haci un infraccion riba siguranza huridico di e ciudadano.

“Esaki ta door cu no tabata tin un ley, pero nos a actua pa sigura sobrevivencia di e ciudadano”, segun e mandatario.