Gobernante tambe a desaproba pelea inhumano riba caya principal di Bonaire

KRALENDIJK: Den fin di siman e isla di Bonaire a conoce un pelea violento, fuerte, y espantoso pa colmo den Caya Principal di e isla. 

Kralendijk nunca antes a yega di mira un pelea asina intenso di hendenan ta manda mokete riba otro.

   Pa colmo, tin hendenan cu a graba video di e bringamento y esaki a bira viral na e isla y ta casi tur hende a mire.

   Un gobernante tambe a mire, y pesey mes siman a habri y e Miembro di Conseho Insular, esta Désirée Coffie a expresa su repudio y disgusto pa loke a socede den Caya y cu el a describi como un “pelea inhumano”.

   El a bisa cu como miembro di Conseho Insular, como mama, pero tambe como ciudadano di e isla aki, e ta desaproba energicamente e loke a tuma luga siman pasa, caminda den un forma inhumano un abuso fisico y di maltrato severo a tuma luga den cayanan principal di Bonaire. No ta importante kico por a pasa ni ken tin falta, y tampoco ken a cuminsa, simplemente den un comunidad civiliza algo asina ta intolerable y inacceptable.

   “Mi ta spera cu e medidanan apropia pa nos leynan lo keda aplica pa asina manda un señal cla y raspa cu nos no ta tolera e tipo di violencianan aki den nos comunidad. Nos como hende no ta soluciona problema cu violencia y sigur no cu violencia cu den nos Codigo Penal ta cay bao di maltrato fisico severo y cu por tin hasta consecuencianan fatal,” Coffie a indica.

   El a sigui bisa: “Loke a pasa, a pasa caba, pero e desaprobacion fuerte di henter nos comunidad combina cu aplicacion di nos leynan, mester preveni cu cualkier cu ta pensa di resolve un problema di e manera aki, lo pensa tres biaha prome cu actua asina aki.”